Ádiletti Qazaqstan týraly arman – Jańa Konstıtýtsııany qoldaıtyn Koalıtsııa quryldy

ASTANA. KAZINFORM – Búgin elordada elimizdiń jetekshi qoǵamdyq-saıası kúshteri «Ádiletti jáne Progressıvti Qazaqstannyń Halyqtyq Konstıtýtsııasy úshin!» atty Jalpyulttyq koalıtsııaǵa birikti. Onyń quramyna bes jetekshi saıası partııanyń ókilderi men mıllıondaǵan azamattyń múddesin bildiretin 300-den astam qoǵamdyq uıym endi.

Otyrysqa qatysýshylar Jańa Konstıtýtsııa jobasy saıası júıe arhıtektýrasyn qoǵamnyń jańa suranysyna saı túbegeıli qaıta jańǵyrtatynyn atap ótti. Bul bıliktiń barlyq tarmaǵynyń turaqty jumysyn qamtamasyz etedi.

Májilis Spıkeri, Jalpyulttyq Koalıtsııa jetekshisiErlan Qoshanov atap ótkendeı, Jańa Konstıtýtsııa – shyn máninde tarıhı qujat. Onda eń aldymen adamǵa basymdyq berilip, memlekettiń basty baılyǵy jer qoınaýyndaǵy resýrstar emes, bilimdi jas urpaq ekeni aıqyndaldy. Bul – Prezıdent qolǵa alǵan aýqymdy ózgeristerdiń altyn arqaýy. Endi ol eń joǵary konstıtýtsııalyq deńgeıde bekitilip jatyr.

– Qazaqstannyń jańa Konstıtýtsııasy – osy irgeli reformalardyń shyrqaý shyńy. Bul – Prezıdentimizdiń jyldar boıǵy oı-tolǵamdarynyń jemisi. Halyqtyń muń-muqtajy, talap-tilegi men úmit-senimi ushtasqan tarıhı qujat. Sondyqtan Jańa Konstıtýtsııa halyqpen birge jazylǵan – naǵyz Halyqtyq Konstıtýtsııa deýge tolyq negiz bar. Biz keler urpaqqa ár azamat maqtan tutatyn, Órkendegen, Ádiletti Qazaqstandy qaldyrýymyz kerek. Bárimizdi biriktiretin osy asqaq arman. Sol armanǵa – Ádiletti ári Progressıvti Qazaqstanǵa Prezıdentimizben birge jeteıik, – dedi ol.

Óz sózinde Memlekettik keńesshi Erlan Qarın Jańa Konstıtýtsııanyń mańyzyna toqtaldy.

– Qazaqstan bolashaqta azamattary bilimdi, ǵylymdy meńgergen, ınnovatsııaǵa arqa súıegen, tehnologııasy damyǵan elderdiń qatarynda bolýǵa umtylatynyn baıqatty. Sondyqtan, bul eldiń órkendeýine jańa serpin beretin Konstıtýtsııa, – dedi ol.

Sondaı-aq otyrys barysynda «Aýyl» partııasynyń tóraǵasy Serik Egizbaev, «Aq jol» Qazaqstan Demokratııalyq partııasynyń tóraǵasy Azat Perýashev, «Respublica» partııasynyń tóraǵasy Aıdarbek Qojanazarov, Májilistegi Qazaqstan Halyq partııasy fraktsııasynyń jetekshisi Magerram Magerramov, Májilis depýtattary, «AMANAT» partııasy fraktsııasynyń músheleri Erlan Saırov, Únzıla Shapaq jáne Sergeı Ponomarev sóz sóıledi.

Sonymen qatar «AgromashHoldıngKZ» AQ Prezıdenti Dınara Shúkijanova, Respýblıkalyq advokattar alqasynyń tóraǵasy Mádı Myrzaǵaraev, saıasattanýshy Marat Shıbutov, «Qazaq tili» halyqaralyq qoǵamynyń Prezıdenti Raýan Kenjehanuly óz ustanymyn bildirdi.

Kezdesýge qatysýshylar Jańa Konstıtýtsııa jobasy memlekettiń saıası júıesin odan ári jańǵyrtýǵa, áleýmettik kepildikterdi nyǵaıtýǵa, kásipkerlikti qoldaýǵa, ǵylymdy, mádenıetti jáne ulttyq qundylyqtardy damytýǵa baǵyttalǵan strategııalyq baǵdarǵa tolyq sáıkes keletinin atap ótti.

Sonymen qatar memleket ınstıtýtsıonaldyq ózgerister jolynda mańyzdy kezeńnen ótkeni ataldy. «Kúshti Prezıdent – yqpaldy Parlament – esep beretin Úkimet» formýlasy nyǵaıyp keledi, Konstıtýtsııalyq Sot jumys istep jatyr, zańsyz shyǵarylǵan aktıvter memleketke qaıtarylyp jatyr, ulttyq resýrstardy ádil bólý qaǵıdaty kúsheıtilip jatyr. Bul barlyq sheshim ádildik, teńdik jáne bolashaq urpaq aldyndaǵy jaýapkershilik qundylyqtaryna negizdeldi.

Jańa Negizgi zań qoǵamdaǵy tereń ózgerister men dúnıetanymy jańarǵan, memleketke joǵary talap qoıatyn jańa býynnyń qalyptasýyna jaýap retinde qabyldanǵany atap ótildi. Osy úmitterdiń ózeginde adaldyqqa, zań ústemdigine, adamnyń qadir-qasıetine degen qurmetke jáne adam quqyǵyna kepildik berýge degen suranys jatyr. Jańa Konstıtýtsııa osy qoǵamdyq talaptarǵa aıqyn ári naqty jaýap beredi.

Sondaı-aq Negizgi zań jobasy qoǵammen ashyq ári aýqymdy dıalog aıasynda ázirlengeni aıtyldy. Konstıtýtsııalyq komıssııa jumysy jarııa túrde, tikeleı efırde jáne turaqty keri baılanys ornata otyryp júrgizildi. Osy ýaqyt aralyǵynda azamattardan, sarapshylardan, kásibı qaýymdastyqtardan jáne túrli sala ókilderinen 10 myń usynys pen ótinish kelip tústi. Olardyń árqaısysy qujatty ázirleý barysynda qaralyp, eskerilip otyrdy.

Sóz sóılegen barsha azamat osy sheshýshi kezeńde Jańa Konstıtýtsııany qabyldaýdyń tarıhı mańyzyn qalyń jurtshylyq arasynda ilgeriletý úshin qoǵamdaǵy jetekshi kúshterdi biriktirýdiń mańyzyn atap ótti.

Koalıtsııa quramyna saıası partııalardyń ortalyq jáne óńirlik qurylymdary, respýblıkalyq qoǵamdyq birlestikter, Parlament jáne máslıhat depýtattary, ǵylymı jáne sarapshylyq qaýymdastyq ókilderi, mádenıet jáne sport qaıratkerleri, kásipodaq uıymdary, salalyq qaýymdastyqtar men jastar birlestigi kirdi.

Jýyrda Koalıtsııa músheleri óńirlerde túsindirý jumysyn bastaıdy. Aldaǵy referendým qarsańynda ashyq dıalog pen azamattardyń sanaly túrde qatysýyn qamtamasyz etý maqsatynda eńbek ujymdarymen, sarapshylar qaýymymen jáne turǵyndarmen kezdesý ótkizý josparlanyp otyr. Sonyń ishinde shalǵaı eldi mekender de nazardan tys qalmaıdy. Sebebi árbir qazaqstandyq azamattyń daýysy asa mańyzdy.

Buǵan deıin Referendýmdy daıyndaý jáne ótkizý kezeńinde qandaı úgitterge tyıym salynatynyn jazǵan bolatynbyz.