Ádiletti ári Órkenıetti memleket jolynda bar kúsh-jigerimdi salyp kelemin — Toqaev
ASTANA. KAZINFORM — Zańǵa qurmetpen qaraıtyn adam árqashanda tabysty bolady. Bul týraly Qazaqstan halqyna Joldaýyn jarııalaý kezinde Prezıdent Qasym-Jomart Toqaev málim etti.
— Jalpy, kez kelgen reformany iske asyrý úshin zańdardy jetildirý, saıası ınstıtýttardy nyǵaıtý jetkiliksiz. Eń aldymen, sana jańǵyrýǵa tıis. Elimiz ornyqty damýy úshin qoǵamda jańa etıka ornyǵýy qajet. «Adal azamat» ıdeologııasy ómirimizdiń ajyramas bóligine aınalýy kerek. «Áreket túbi — bereket» degen halqymyz. Sondyqtan meılinshe shıraq bolyp, otanshyl azamat ekenimizdi jasampaz istermen kórsetý asa mańyzdy. Al otanshyl bolý — zańdy qurmetteý, tártipke baǵyný, el ıgiligi úshin tabandy eńbek etý degen sóz. Zańǵa qurmetpen qaraıtyn adam árqashanda tabysty bolady. Men Qazaqstan árbir azamattyń damýyna jol ashatyn, jalpyǵa birdeı múmkindik beretin, birligi bekem, Ádiletti ári Órkenıetti memleket bolýyn tileımin. Atalǵan maqsatqa jetý úshin bar kúsh-jigerimdi salyp kelemin jáne aldaǵy ýaqytta da solaı bolady, — dedi Qasym-Jomart Toqaev.
Prezıdenttiń aıtýynsha, qazirgi zamannyń basty qýaty — bilim men ǵylymda, ozyq ınnovatsııalarda. Jańa tehnologııalardy, jasandy ıntellektini tereń meńgergen el damıdy.
— Memleketimizge myqty ǵalymdar, kásibı ınjenerler, ulaǵatty ustazdar men bilikti dárigerler árqashanda kerek bolady. Men ultymyzdyń kóshin alǵa bastaı alatyn otanshyl azamattarǵa zor úmitpen qaraımyn. Búgin men elimizde jasalyp jatqan aýqymdy ózgeristerge keńinen toqtaldym. Jarqyn bolashaǵymyzdy aıqyndaıtyn mańyzdy bastamalar jóninde aıttym. Aldymyzda turǵan tarıhı mindetterdi tabysty júzege asyrýymyz kerek. Biz ár azamattyń damýyna, barsha jurttyń órkendeýine jol ashatyn berekeli qoǵam, Ádiletti Qazaqstandy mindetti túrde quramyz. Barshańyzǵa amandyq jáne tabys tileımin! Otanymyz — Qazaq eli máńgi jasasyn! , — dedi Memleket basshysy.
Aıta ketelik Prezıjent jańa Azamattyq kodeks qabyldaý qajet ekenin aıtqan edi.
