Ádilet vıtse-mınıstri onlaın senimhattardyń qaýipsizdigi men alıment óndirý júıesin túsindirdi

ASTANA. KAZINFORM — Ortalyq kommýnıkatsııalar qyzmetinde ótken baspasóz konferentsııasynda Parlamentte qaralyp jatqan jasandy ıntellekt týraly zań jobasy jáne aqparattyq qaýipsizdik máseleleri talqylandy. Іs-shara barysynda QR Ádilet vıtse-mınıstri Bekbolat Moldabekov jýrnalısterdiń suraqtaryna jaýap berdi. 

Jýrnalıster tsıfrlyq notarıat jobasy arqyly onlaın formatta beriletin senimhattardyń qaýipsizdigine qatysty saýal qoıdy.

— Biz sońǵy eki jylda 520 myńnan astam onlaın senimhat berdik. Osy ýaqyt ishinde birde-bir shaǵym, sot daýy nemese kúmándi jaǵdaı tirkelgen joq. Sebebi barlyq protses tolyq qaýipsizdik júıeleri arqyly júrgiziledi. Barlyq áreket eGov portaly jáne bıometrııalyq rastaý arqyly júzege asady. Eger notarıýs adamnyń jaǵdaıyna kúmándansa — mysaly, onyń mas kúıinde ekenin nemese qysymmen áreket etip otyrǵanyn baıqasa, ol birden qyzmet kórsetýden bas tartady. Bul bas tartý júıede belgilenedi jáne basqa notarıýstar da sol aqparatty kóredi. Osylaısha, Ádilet mınıstrligi jáne «Ulttyq aqparattyq tehnologııalar» AQ da protsestiń qaýipsizdigine jaýap beremiz, — dedi vıtse-mınıstr.

Sonymen qatar jýrnalıster qazirgi ýaqytta alıment tóleýshilerden qaryzyn ala almaı júrgen azamattardyń shaǵymy kóbeıgenin aıtyp, tsıfrlyq júıe bul máseleni sheshýge kómektese me degen saýal qoıdy.

— Iá, árıne. Bizde «Ádilet» mobıldi qosymshasy bar. Barlyq azamatty osy qosymshany júkteýge shaqyramyz. Ol arqyly jeke sot oryndaýshylardyń is-áreketterin baqylap otyrýǵa bolady. Sondaı-aq júıede sot oryndaýshysy qandaı kúni qandaı is júrgizýi tıis ekeni de kórsetilgen. Tsıfrlandyrýdyń arqasynda komıtet azamattardyń shaǵymdaryn naqty qadaǵalap, palata tıisti shara qoldanbasa, biz birden lıtsenzııadan aıyrý máselesin qaraı alamyz, — dep túsindirdi Bekbolat Moldabekov.

Eske sala keteıik, Oljas Bektenov Prezıdenttiń «Zań jáne tártip» tujyrymdamasy sheńberinde ádilet organdarynda tsıfrlyq sheshimderdi engizý barysymen tanysqan edi.