«Ádilet» saıası partııasy memlekettik tirkeýden ótti

Partııanyń habarlaýynsha, 2026 jylǵy 1 maýsymda QR zańnamasyna sáıkes Ádilet mınıstrligi «Ádilet» saıası partııasyn resmı túrde memlekettik tirkeýden ótkizdi.

Jańa saıası uıymnyń quramyna túrli salalardaǵy kásibı qaýymdastyq ókilderi engen.

– Partııa qatarynda eńbek adamdary, munaı servıstik jáne taý-ken metallýrgııasy salalarynyń qyzmetkerleri, shahterler, sportshylar, pedagogter, dárigerler, ǵalymdar, kásipkerler, IT-mamandary, zańgerler jáne kreatıvti ındýstrııa ókilderi bar, – delingen habarlamada.

Partııa baǵdarlamasy ádilettilik, jaýapkershilik, zańdylyq, teńdik, otansúıgishtik jáne progress qaǵıdattaryna negizdelgen.

Uıymnyń negizgi basymdyqtary retinde zań ústemdigi men quqyqtyq tártipti nyǵaıtý, tıimdi memlekettik ınstıtýttardy damytý, óńirlerdi qoldaý, tsıfrlandyrýdy ilgeriletý, adamı kapıtaldy damytý jáne básekege qabiletti ekonomıkany qalyptastyrý belgilengen.

– «Ádilet» partııasy óz qyzmetin kásibılikke, qoǵamdyq dıalogqa jáne jaýapty azamattyq ustanymǵa súıene otyryp, ádiletti, zamanaýı ári básekege qabiletti Qazaqstandy damytýǵa qosylatyn úles dep qarastyrady, – dep málimdedi partııa ókilderi.

Málimetke sáıkes, aldaǵy kezeńde partııa uıymdyq qurylymyn odan ári qalyptastyryp, óńirlerdegi jumysyn júıeli túrde damytýdy josparlap otyr.

Aıta keteıik, buǵan deıin «Ádilet» partııasynyń jarǵysy men baǵdarlamasy qoǵam talqysynan ótkeni habarlandy.