«Ádilet» partııasynyń sezi: Amanat partııasyn qosý týraly sheshim maquldandy
ASTANA. KAZINFORM - Bul týraly sezde partııa delegattary men basshylyǵy málimdedi.
Sezd barysynda bul qadam eldiń saıası júıesindegi mańyzdy ózgeristerdiń biri retinde sıpattalyp, saıası kúshterdiń ortaq maqsattar tóńireginde toptasýy retinde baǵalandy.
Partııa tóraǵasy Aıbek Dádebaıdyń aıtýynsha, qabyldanǵan sheshim eki uıymnyń birigýi ǵana emes, sonymen qatar qoǵamdaǵy progressıvti jáne jaýapty saıası kúshterdiń konsolıdatsııasyn bildiredi.
– Búgin biz mańyzdy saıası qadamǵa kýá bolyp otyrmyz. Bul tek eki partııanyń birigýi emes, ortaq maqsat jolynda áreket etetin saıası kúshterdiń toptasýy, – dedi ol.
Onyń aıtýynsha, bul sheshim memleket pen qoǵam múddesin alǵa qoıýǵa baǵyttalǵan saıası mádenıettiń kórinisi bolyp tabylady.
Sezde sondaı-aq partııanyń óńirlik qurylymdaryn damytý, fılıaldar qurý jáne olardyń erejesin bekitý máseleleri qaraldy. Delegattar bul protsester partııanyń jergilikti deńgeıdegi jumysyn kúsheıtýge múmkindik beretinin atap ótti.
Aıbek Dádebaı partııanyń jańa kezeńge aıaq basqanyn aıtyp, uıymnyń aldaǵy mindetterin de aıqyndady. Onyń sózinshe, negizgi basymdyqtar qatarynda zań ústemdigin qamtamasyz etý, ádilettilikti memlekettik saıasattyń negizine aınaldyrý jáne azamattardyń kúndelikti ómirinde reformalardyń naqty nátıjesiniń kórinýin qamtamasyz etý bar.
Sezge qatysýshylardyń aıtýynsha, AMANAT partııasymen birigý eldegi saıası úderisterdiń tıimdiligin arttyryp, qoǵamdyq kelisimdi nyǵaıtýǵa yqpal etedi.
Eske salsaq elordada «Ádilet» partııasynyń II Sezi ótip jatyr.
