«Ádilet» partııasynyń sezi: uıymdy damytý jáne óńirlik jelini keńeıtý máseleleri qaraldy
ASTANA. KAZINFORM — Astanada «Ádilet» partııasynyń II sezi ótip, onda uıymdy damytý jáne óńirlik qurylymdy keńeıtýge qatysty birqatar mańyzdy másele qaraldy.
Sezd qarsańynda ótken strategııalyq sessııa barysynda delegattar partııanyń aldaǵy kezeńdegi basym baǵyttaryn talqylap, uıymnyń ınstıtýtsıonaldyq damýyna qatysty usynystardy qarastyrdy.
Sezd barysynda sóz sóılegen partııa tóraǵasy Aıbek Dádebaı Qazaqstannyń jańa damý kezeńine aıaq basqanyn atap ótip, saıası kúshterdiń qoǵammen tyǵyz jumys isteýi jáne azamattardyń suranysyna jedel jaýap berýi mańyzdy ekenin aıtty.
— Biz Prezıdent Qasym-Jomart Toqaevtyń Ádiletti Qazaqstan qurý baǵytyn tolyq qoldaımyz jáne ony memleketti uzaq merzimdi nyǵaıtýdyń strategııalyq baǵdary dep sanaımyz. Alaıda reformalardyń tabysty júzege asýy tek memlekettik sheshimderge ǵana baılanysty emes. Ol qoǵamnyń ózgeristerge qatysýǵa daıyndyǵymen jáne saıası kúshterdiń jaýapkershilikpen áreket etýimen ólshenedi. «Ádilet» partııasy qurylǵan sátten bastap «ádiletsiz turaqty damý bolmaıdy» degen qaǵıdatty ustanyp keledi. Ádil erejeler bar jerde senim qalyptasady, senim bar jerde ınvestıtsııa keledi, kásipkerlik damıdy, azamattyq belsendilik artady, — dedi Aıbek Dádebaı.
Sezdegi negizgi sheshimderdiń biri — elimizdiń barlyq óńirinde partııa fılıaldaryn qurý bastamasyn qoldaý boldy. Delegattar bul qadam uıymnyń jergilikti deńgeıdegi jumysyn kúsheıtip, azamattarmen tikeleı baılanys ornatýǵa múmkindik beretinin atap ótti.
Partııa Saıası keńesiniń múshesi Bórihan Nurmuhamedov óńirlik qurylymnyń róline toqtalyp, partııanyń bolashaǵy eń aldymen jergilikti jerlerdegi tıimdi jumysqa baılanysty ekenin aıtty.
— Partııanyń taǵdyry óńirlerde sheshiledi. Azamattardyń senimi de sol jerde qalyptasady. Sondyqtan óńirlik fılıaldar tek formaldy qurylym emes, qoǵammen kúndelikti baılanys ornatatyn naqty jumys alańy bolýy tıis, — dedi ol.
Sezd barysynda sondaı-aq adamı kapıtaldy damytý, bilim berý salasyn jetildirý, zamanaýı tehnologııalardy engizý jáne azamattyq qoǵam ınstıtýttaryn nyǵaıtý máseleleri talqylandy.
Partııa ókilderiniń aıtýynsha, óńirlik jelini keńeıtý jańa kóshbasshylardy tartýǵa jáne azamattardyń qoǵamdyq-saıası protsesterge qatysý múmkindigin arttyrýǵa jol ashady.
Sezd qorytyndysynda qatysýshylar partııa qyzmetiniń tıimdiligin arttyrý jáne uıymdyq qurylymdy nyǵaıtý arqyly «Ádilet» partııasynyń áleýetin kúsheıtý baǵytynda jumystardy jalǵastyrý qajettigin atap ótti.
Aıta ketelik «Ádilet» partııasy óńirlik jumysty kúsheıtpek.
