«Ádilet» partııasynyń sezi 14 maýsymda Astanada ótedi
ASTANA.KAZINFORM — «Ádilet» partııasynda Saıası keńestiń otyrysy ótip, onda uıymdyq damý, óńirlik qurylymdy nyǵaıtý máseleleri men partııa jumysynyń aldaǵy baǵyttary talqylandy. Partııa tóraǵasy Aıbek Dádebaı «Ádilet» partııasynyń qurylýy qoǵamnyń ádildikke degen umtylysy men qazaqstandyqtardyń belsendi qoldaýynyń nátıjesi ekenin atap ótti.
Partııa músheleriniń aldynda qoǵamdyq bastamalardy, kásibı tájirıbeni jáne belsendi azamattardy eldi damytý jolynda toptastyra otyryp, ortalyqta jáne óńirlerde tıimdi jumys júıesin qalyptastyrý mindeti tur.
— Búginde ádildik ıdeıasyn qoǵam barǵan saıyn keńinen qoldap kele jatqanyn kórip otyrmyz. Partııa tóńiregine eńbek adamdary, kásibı qaýymdastyq ókilderi, jastar men qoǵam qaıratkerleri bas qosyp jatyr. Aldymyzda óńirlerde tıimdi uıymdar qurý, partııalyq basqarýdyń zamanaýı júıesin qalyptastyrý, partııanyń myqty saraptamalyq jáne kadrlyq áleýetin jasaqtaý mindeti tur. Eń bastysy — azamattardyń senimin aqtaýymyz kerek. Biz Memleket basshysynyń barlyq progressıvti kúshterdi Ádiletti Qazaqstan ıdeıasynyń tóńiregine toptastyrý jónindegi úndeýin qoldaımyz jáne naqty bastamalar, ashyq dıalog pen jaýapty jumys arqyly osy baǵytty iske asyrýǵa óz úlesimizdi qosýǵa daıynbyz, — dedi partııa tóraǵasy Aıbek Dádebaı.
Otyrysta 14 maýsym kúni Astanada ótetin partııanyń ІІ sezine daıyndyq pysyqtalyp, partııalyq qurylymdy odan ári damytýǵa jáne óńirlerdegi jumysty jetildirýge qatysty birqatar uıymdastyrý máseleleri qaraldy.
Talqylaý barysynda Saıası keńes músheleri partııa jumysynyń aldaǵy negizgi baǵyttaryn qoldady. «Ulttyq rýh» qoǵamdyq birlestiginiń tóraǵasy Aıat Súgirbaı partııalyq qurylymdy nyǵaıtý men óńirlerdegi jumysty damytýdyń mańyzyn atap ótti. Al saıasattanýshy Búrihan Nurmuhamedov qoǵamdy ádildik, jaýapkershilik jáne eldiń jasampaz damýy jolynda kúsh biriktirýdiń mańyzdylyǵyna toqtaldy.
Aıta keteıik, partııa qoǵamdyq jáne kásibı birlestiktermen yntymaqtastyqty arttyryp, Ádiletti Qazaqstandy damytýǵa qatysty ózekti máseleler boıynsha jańa bastamalar ázirlep jatyr.
Aıta keteıik, qoǵamdyq birlestikter men kásibı qaýymdastyqtar «Ádilet» partııasyna qoldaý bildirdi.
