«Ádilet» partııasynyń qoldaýymen «Jan Shýaq» syılyǵynyń laýreattary marapattaldy
ASTANA. KAZINFORM – Astanada «Ádilet» partııasynyń qoldaýymen Qazaqstan múgedekter konfederatsııasy uıymdastyrǵan XIX «Jan Shýaq» qoǵamdyq syılyǵyn tabystaý rásimi ótti.
Jıyrma jylǵa jýyq ýaqyttan beri ótkizilip kele jatqan syılyq ınklıýzııany, teń múmkindikter men adam qadir-qasıetin dáripteýge úles qosyp júrgen azamattardy marapattaıtyn qoǵamdyq alańǵa aınaldy.
Saltanatty rásimde sóz sóılegen «Ádilet» partııasynyń tóraǵasy Aıbek Dádebaı «Jan Shýaq» syılyǵy búginde qoǵamdaǵy mańyzdy dıalog alańdarynyń birine aınalǵanyn aıtty.
«Búgin biz mamandyǵy da, taǵdyry da ártúrli adamdarǵa qurmet kórsetip otyrmyz. Sizderdi biriktiretin ortaq qasıet – nátıjege qol jetkize bilý jáne óz maqsattaryńyzǵa adal bolý. Sizder óz eńbekterińiz ben jaýapkershilikterińiz arqyly ómirimizdi jaqsartyp kelesizder. Kópshilik sizderge qarap boı túzeıdi. Árqaısyńyzǵa qosqan úlesterińiz ben ózgelerge kórsetip júrgen ónegelerińiz úshin shynaıy alǵysymdy bildiremin», – dedi ol.
Bıylǵy syılyq halyqaralyq jarystardyń jeńimpazdary men júldegerlerine, qoǵam qaıratkerlerine, kásipkerlerge, mádenıet jáne IT salasynyń ókilderine tabystaldy.
Olardyń qatarynda 2026 jylǵy qysqy Paralımpıada chempıony Erbol Hamıtov, 2024 jylǵy Paralımpıadanyń qola júldegeri Dastan Muqashbekov, Future-IT robototehnıka mektebiniń negizin qalaýshy Damır Nýrkejanov, IT-maman ári parasportshy Aısulý Súleımenova, mýzykant Kenjebek Nurdoldaı jáne kásipker Dınara Kutjolova bar.
Halyqaralyq laýreattar retinde japon skrıpkashysy, Gınnestiń rekordtar kitabyna engen Manamı Ito men Elbrýs jáne Everest shyńdaryn bilek kúshimen baǵyndyrǵan alǵashqy paraalpınıst Rýstam Nabıev marapattaldy.
Laýreattar atynan sóz sóılegen Erbol Hamıtov qoǵamdaǵy ózara qoldaý men qurmettiń mańyzyn atap ótti.
«Azamattardyń shynaıy qoldaýy, atsalysýy jáne bir-birine degen qurmeti adamdardyń óz kúshine senim artyp, alǵa umtylýyna kómektesedi. Dál osy áreketter qoǵamdy nyǵaıta túsedi», – dedi Paralımpıada chempıony.
Óz sózinde Aıbek Dádebaı ınklıýzıvti qoǵam qurý «Ádilet» partııasynyń basym baǵyttarynyń biri ekenin aıtty.
«"Ádilet" partııasy úshin teń múmkindikter qalyptastyrý – basty qundylyqtardyń biri. Búgingi laýreattar óz ónegesimen ınklıýzııa erekshe qajettiligi bar adamdardy qoldaýmen ǵana shektelmeıtinin dáleldep otyr. Bul – árbir adamnyń óz áleýetin ashýyna, qabiletin júzege asyrýyna jáne qoǵam ómirine tolyqqandy qatysýyna jaǵdaı jasaý. Ádiletti Qazaqstan dál osyndaı qaǵıdattar negizinde qurylady», – dedi partııa tóraǵasy.
