«Ádilet» partııasynyń ataýy ózgere me
ASTANA. KAZINFORM — «Ádilet» partııasynyń Saıası keńes bıýrosynyń múshesi Raýan Kenjehanuly AMANAT partııasynyń «Ádiletke» qosylýy týraly sheshim qabyldanǵannan keıin partııanyń ataýy saqtalatynyn jáne aldaǵy ýaqytta vızýaldy brend elementteri kezeń-kezeńimen jańartylatynyn málimdedi.
Onyń aıtýynsha, AMANAT partııasy «Ádilet» partııasynyń quramyna qosylý týraly bastama kótergen.
— Keshe bizdiń áriptesterimiz — AMANAT partııasy «Ádilet» partııasyna qosylýǵa nıet bildirdi. Búgin biz bul usynysty qarap, qabyldaý týraly sheshim qabyldadyq, — dedi Raýan Kenjehanuly.
Saıasatkerdiń sózinshe, birigý týraly saıası sheshim qabyldanǵannan keıin partııanyń ataýy retinde «Ádilet» saqtalady. Osyǵan baılanysty óńirlerdegi partııalyq nysandarda da ózgerister kezeń-kezeńimen júrgiziledi.
— Sondyqtan mańdaıshalar, logotıpter jáne basqa da vızýaldy brend elementteri ózgere bastaýy zańdy qubylys. Degenmen munyń naqty qashan júzege asatyny ázirge talqylanǵan joq, — dedi ol.
Raýan Kenjehanuly qazirgi kezde barlyq úderistiń qarqyndy júrip jatqanyn atap ótti.
— Barlyǵy óte jyldam órbip jatyr. Búgingi sezd jáne qabyldanǵan sheshim bul jumysty bastaýǵa jaqsy sıgnal boldy dep oılaımyn, — dedi ol.
Sondaı-aq ol óńirlerdegi fılıaldardy qaıta uıymdastyrý men zańdyq rásimdeý jumystary aldaǵy ýaqytta kezeń-kezeńimen júzege asyrylatynyn jetkizdi.
Aıta ketelik AMANAT atynan saılanǵan máslıhat depýtattary jumysyn jalǵastyrady.
