«Ádilet» partııasy jańa Konstıtýtsııaǵa baılanysty málimdeme qabyldady
ASTANA. KAZINFORM — Búgin «Ádilet» partııasynda Qazaqstan Respýblıkasy jańa Konstıtýtsııasynyń kúshine enýine arnalǵan partııa aktıviniń kezdesýi ótti.
Oǵan partııanyń Saıası bıýrosy men Saıası keńesiniń músheleri, sondaı-aq elimizdiń barlyq 20 óńiriniń ókilderi beınekonferentsııa baılanysy arqyly qatysty. Bul format partııanyń uıymdastyrýshylyq qyzmetine tsıfrlyq quraldardy engizý baǵytynyń bir bóligi.
Kezdesýdi ashqan Partııa tóraǵasy jańa Konstıtýtsııanyń kúshine enýi memleket damýynyń mańyzdy kezeńi ekenin jáne eldiń qoǵamdyq-saıası damýynyń jańa baǵdarlaryn aıqyndaıtynyn atap ótti.
— Búgin — Qazaqstan úshin sondaı aıtýly beles. Elimizde Jańa Konstıtýtsııa kúshine endi. Bul — jaı ǵana quqyqtyq oqıǵa emes, Qazaqstannyń tarıhı damýyndaǵy jasampazdyq pen jańǵyrý jolynyń bastaýy, — dedi Aıbek Dádebaı.
Kezdesýge qatysýshylar memlekettik basqarýda konstıtýtsııalyq qaǵıdattardy iske asyrý, zań ústemdigin nyǵaıtý, azamattardyń quqyqtaryn qorǵaý, adamı kapıtaldy damytý, tsıfrlandyrý jáne qoǵamnyń qatysýyn keńeıtý máselelerin talqylady. Partııanyń Saıası keńesi men Konstıtýtsııalyq komıssııasynyń músheleri Bórihan Nurmuhamedov pen Laýra Qarabasova da jańa Konstıtýtsııa eldiń odan ári damýy úshin mańyzdy ekenin jetkizdi.
— «Ádilet» partııasy jańa Konstıtýtsııanyń partııasy retinde dúnıege keldi. Onyń konstıtýtsııalyq referendýmnan keıin paıda bolýynyń tereń saıası máni bar, — dedi Bórihan Nurmuhamedov.
Laýra Qarabasova Ata Zań bilim, ǵylym jáne adamı kapıtaldyń eldiń uzaq merzimdi damýy úshin negizgi faktor retindegi mańyzyn arttyratynyn aıtty.
— Búginde biz adamı kapıtal men ǵylymı áleýet memlekettiń uzaq merzimdi damýynyń negizgi faktoryna aınalǵan tarıhı kezeńde turmyz. Jańa Konstıtýtsııa bilim men ǵylymnyń rólin jańa deńgeıge kóteredi, — dedi ol.
Talqylaýdyń bir bóligi konstıtýtsııalyq qundylyqtardy is júzinde júzege asyrý máselesine arnaldy. Áleýmettik ınnovatorlar qaýymdastyǵynyń prezıdenti, Saıası keńes múshesi Emın Áskerov áleýmettik kásipkerliktiń ádildik pen teń múmkindikter qaǵıdattaryn ilgeriletýdegi mańyzyn atap ótti. Al Saıası keńes bıýrosynyń múshesi Zamıra Kýzıeva jańa Konstıtýtsııa azamattardyń quqyqtary men bostandyqtaryn qorǵaýdy kúsheıtip, zań ústemdigi qaǵıdatyn nyǵaıtatynyn aıtty.
— Jańa Konstıtýtsııa — bul ádiletti, jaýapty, zamanaýı memleket qurý jolyndaǵy mańyzdy qadam. Ol árbir azamattyń quqyǵy men erkindigin qorǵaýdy, zań ústemdigin kúsheıtýdi jáne memleket jumysynyń basty ólshemi adam múddesi bolýy tıis ekenin aıqyn kórsetedi, — dedi Zamıra Kýzıeva.
Tsıfrlyq transformatsııa máselesine toqtalǵan Saıası keńes múshesi Nurbek Matjanı jańa Konstıtýtsııanyń zamanaýı tehnologııalyq syn-qaterlerdi eskeretinin aıtyp, «Ádilet» partııasy óz jumysyna tsıfrlyq quraldardy júıeli túrde engizip kele jatqanyn jetkizdi.
— Ádilet partııasy óz aldyna tsıfrlyq partııa bolý mindetin qoıyp otyr, alǵashqy qadamdarymyz da jaman emes. Táýelsiz Qazaqstan tarıhynda birinshi bolyp partııany tirkeý satysynda tsıfrlyq sheshimderdi sátti qoldandy, — dedi Nurbek Matjanı.
Talqylaýdy Saıası keńes bıýrosynyń múshesi, jýrnalıst Irına Ten qorytyndylady. Onyń pikirinshe, jańa Konstıtýtsııanyń kúshine enýi memleket pen qoǵam damýynyń jańa kezeńiniń bastalǵanyn bildiredi.
— Jańa Konstıtýtsııa — Jańa dáýir degen ataý jaı ǵana uran emes. Bul — Qazaqstannyń bolashaǵyna, memleket pen qoǵamnyń jańa sapasyna, azamat quqyǵy men adam qadir-qasıetine degen jańasha kózqarastyń kórinisi, — dedi Irına Ten.
Partııa tóraǵasy «Ádilet» partııasynyń basty basymdyǵy jańa Konstıtýtsııa qaǵıdattaryn is júzinde júzege asyrý ekenin atap ótti.
— «Ádilet» partııasy qoǵammen jáne azamattarymyzben birge osy jaýapty mıssııany oryndaýǵa tolyq daıyn. Jańa Konstıtýtsııanyń qaǵıdattary bizdiń qyzmetimizdiń negizinde jatyr. Biz jınaǵan tájirıbe men qoldaǵy barlyq resýrstar osy qaǵıdattardy is júzinde júzege asyrýǵa baǵyttalady, — dep túıindedi Aıbek Dádebaı.
Kezdesý qorytyndysy boıynsha partııanyń Saıası keńesi Qazaqstan Respýblıkasy jańa Konstıtýtsııasynyń kúshine enýine baılanysty málimdeme qabyldap, ádildik, zań ústemdigi, adamnyń qadir-qasıetin qurmetteý, qoǵamdyq kelisim jáne el bolashaǵy aldyndaǵy jaýapkershilik qaǵıdattaryna adaldyǵyn rastady. Osy jumystyń praktıkalyq jalǵasy retinde «Jańa Konstıtýtsııa — Jańa dáýir» atty qoǵamdyq-saıası is-sharalar tsıkli bastaldy. Aldaǵy ýaqytta partııa ókilderi elimizdiń barlyq óńirinde azamattarmen jáne sarapshylar qaýymdastyǵymen kezdesý ótkizip, jańa Konstıtýtsııanyń negizgi erejeleri men olardyń praktıkalyq mańyzyn túsindiredi.
Buǵan deıin «Ádilet» partııasy jasandy ıntellektke negizdelgen tsıfrlyq platforma ázirleıtinin jazǵanbyz.
