«Ádilet» partııasy jasandy ıntellektke negizdelgen tsıfrlyq platforma ázirleıdi
ASTANA. KAZINFORM — «Ádilet» partııasynyń tóraǵasy Aıbek Dádebaı Sinovation Venture jasandy ıntellekt ınstıtýtynyń prezıdenti, doktor Lı Kaı-Fýmen kezdesti.
Taraptar partııa jumysynyń tıimdiligin arttyrý jáne azamattarmen ózara baılanysty nyǵaıtý maqsatynda zamanaýı tsıfrlyq tehnologııalardy qoldaný máselelerin talqylady.
Jýyrda Parlament palatalarynyń birlesken otyrysynda Qazaqstan Respýblıkasynyń Prezıdenti Qasym-Jomart Toqaev tsıfrlyq tehnologııalardy engizý qadamy memlekettik basqarý men zań shyǵarý qyzmetin jetildirýdiń negizgi baǵyttarynyń birine aınalýǵa tıis ekenin atap ótti.
Memleket basshysynyń aıtýynsha, boljamdy saraptamany, Úlken derekqordy jáne zamanaýı tsıfrlyq quraldardy paıdalaný barysy qabyldanatyn sheshimderdiń sapasyn arttyryp, azamattardyń mańyzdy bastamalardy talqylaýǵa qatysý múmkindigin arttyrady.
Kezdesý barysynda Aıbek Dádebaı «Ádilet» partııasy óz jumysyn zamanaýı tsıfrlyq sheshimderdi paıdalaný arqyly júrgizip jatqanyn aıtyp, jasandy ıntellektini azamattarmen keri baılanys ornatý sapasyn arttyrý quraly retinde qarastyratynyn atap ótti.
— Biz azamattarǵa baǵdarlanǵan zamanaýı saıası uıym quryp jatyrmyz. Biz jasandy ıntellektini tek ákimshilik qajettilikter úshin paıdalanǵymyz kelmeıdi. AI bizge qoǵam únin estýge kómektesse deımiz, — dedi Aıbek Dádebaı.
Partııa tóraǵasynyń pikirinshe, búginde azamattardyń ótinishterin qabyldap qana qoımaı, adamdardy naqty qandaı máseleler tolǵandyratynyn túsiný mańyzdy. Zamanaýı tehnologııalar aýqymdy aqparatty taldaýǵa, eń ózekti máselelerdi aıqyndaýǵa jáne olardy zańnamalyq ári partııalyq bastamalardy ázirleý kezinde eskerýge múmkindik beredi. Osy mindetterdi júzege asyrý maqsatynda Aıbek Dádebaı men Lı Kaı-Fý jasandy ıntellekt negizinde mamandandyrylǵan tsıfrlyq platforma qurý máselesin talqylady.
Bul platforma azamattar men kásipkerlerdiń ótinishterin óńdeý isin avtomattandyrýǵa, qoǵamdyq suranystardy júıeleýge, qujattarmen jáne zańnamalyq bazamen jumys isteýge, sondaı-aq alynǵan derekterdi zańnamalyq bastamalar men partııalyq sheshimderdi ázirleý barysynda paıdalanýǵa múmkindik beredi. Lı Kaı-Fý bul tásildi qoldady. Onyń aıtýynsha, aýqymdy ótinishtermen jumys isteý kezinde jasandy ıntellekt aqparatty óńdeý isin avtomattandyryp qana qoımaı, qoǵamnyń negizgi suranysyn anyqtap, azamattardyń pikirin sheshim qabyldaýǵa arnalǵan naqty praktıkalyq usynymdarǵa aınaldyra alady.
— Zamanaýı partııa úshin adamdardy tyńdaý ǵana emes, durys suraq qoıa bilý de mańyzdy. Jasandy ıntellekt negizgi taqyryptardy aıqyndaýǵa, ártúrli stsenarıılerdi modeldeýge jáne anaǵurlym dál sheshimder qabyldaýǵa kómektesedi, — dedi Lı Kaı-Fý.
Kelissózder qorytyndysy boıynsha taraptar partııaǵa arnalǵan AI-platformasynyń arhıtektýrasyn ázirleýge ýaǵdalasty. Kelesi kezeńde jasandy ıntellekt tehnologııalaryn engizýdiń basym baǵyttary aıqyndalyp, jobany júzege asyrý jumysy bastalady.
Aıta ketelik Qazaqstanda jasandy ıntellektige negizdelgen biryńǵaı tsıfrlyq saýda ekojúıesi qurylatyny týraly jazǵan edik.
