«Ádilet» partııasy ótinim qabyldaýdyń tsıfrlyq servısin iske qosty
ASTANA. KAZINFORM — Qazaqstandyqtar nebári birneshe mınýt ishinde onlaın formatta partııaǵa júginý, bastama usyný, qandaı da bir másele týraly habarlaý nemese partııa qataryna qosylý múmkindigine ıe. Azamattarǵa qolaıly jaǵdaı jasaý maqsatynda «Ádilet» partııasy ótinim qabyldaýdyń biryńǵaı tsıfrlyq servısin iske qosty. Bul týraly Partııa Tóraǵasy Aıbek Dádebaı taý-ken metallýrgııa keshenin damytý máselesine arnalǵan Іskerlik keńes alańynda málimdedi.
Jańa servıs qoǵamdyq qabyldaýlarmen, jeke qabyldaýlarmen jáne jazbasha ótinishtermen qatar, azamattarmen ózara baılanys ornatýdyń qosymsha arnasyna aınalady. Oǵan partııanyń resmı saıty nemese biryńǵaı QR-kod arqyly ótýge bolady. Qazaqstannyń árbir azamaty biryńǵaı QR-kod arqyly:
- partııanyń saıası baǵdarlamasymen tanysa alady;
- partııa qataryna onlaın túrde qosyla alady;
- ótinish joldaı alady;
- bastama usyna alady;
- zań buzýshylyq týraly habarlaı alady;
- járdem surap júgine alady.
Paıdalanýshylarǵa qolaıly bolýy úshin ótinimder 26 baǵyttan turatyn biryńǵaı taqyryptyq rýbrıkator boıynsha júıelendi. Bul baǵyttar el ómiriniń barlyq negizgi salalaryn qamtıdy. ıAǵnı, memlekettik basqarý, tsıfrlandyrý, densaýlyq saqtaý, bilim berý, áleýmettik qorǵaý, ekonomıka, kásipkerlik, TKSh, kólik, ekologııa, aýyl sharýashylyǵy, azamattardyń quqyqtary jáne taǵy basqa. Partııa Tóraǵasy Aıbek Dádebaıdyń aıtýynsha, atalǵan platformanyń iske qosylýy elimizdiń tsıfrlyq transformatsııaǵa baǵyttalǵan strategııalyq baǵdaryna tolyq sáıkes keledi.
— Memleket basshysy Parlament palatalarynyń birlesken otyrysynda Qazaqstan zamanaýı tásilderdi, jedel sheshim qabyldaýdy jáne memlekettik ınstıtýttardy turaqty jańǵyrtýdy talap etetin jańa damý kezeńine qadam basqanyn atap ótti. Sondaı-aq Prezıdent tsıfrlandyrý men tehnologııalardyń qarqyndy damýy jaǵdaıynda burynǵydan da jyldam ári tıimdi jumys isteýdiń mańyzyna erekshe nazar aýdardy, - dedi Partııa Tóraǵasy.
Ótinim berý barysy barynsha jeńildetilgen jáne oǵan nebary birneshe mınýt ýaqyt qajet. Ol úshin QR-kod arqyly ótý nemese partııanyń resmı saıtyna kirý, qajetti servısti tańdaý, eGov Mobile qosymshasy arqyly elektrondyq tsıfrlyq qoltańbany paıdalanyp, jeke basyn rastaý jáne ótinim joldaý jetkilikti. Ótinim joldanǵan soń, avtomatty túrde biregeı tirkeý nómiri beriledi. Joldanǵan ótinim qaralǵannan keıin, onyń ıesi kórsetilgen baılanys derekteri boıynsha resmı jaýap alady.
Tsıfrlyq servıstiń iske qosylýy azamattarmen, bıznes ókilderimen jáne sarapshylar qoǵamdastyǵymen turaqty keri baılanys ornatýǵa, kelip túsken ótinishter men usynystardy jedel qabyldaýǵa, júıeli máselelerdi anyqtaýǵa jáne zańnamalyq ári basqarýshylyq sheshimderdi ázirleý kezinde azamattardyń bastamalaryn eskerýge múmkindik beredi. Bul qadam azamattardyń turǵylyqty jerine qaramastan, partııamen baılanysyn barynsha yńǵaıly, jedel ári qoljetimdi etedi.
Aıta keteıik, «Ádilet» partııasy óńirlik jumysty kúsheıtpek.
