«Ádilet» partııasy óńirlik jumysty kúsheıtpek
ASTANA. KAZINFORM — «Ádilet» partııasy aldaǵy ýaqytta óńirlerdegi jumysyn jandandyryp, fılıaldyq jelisin keńeıtýdi josparlap otyr. Bul týraly partııanyń II sezinde «Ádilet» partııasy bastamashyl tobynyń múshesi Bórihan Nurmuhamedov málimdedi.
Onyń aıtýynsha, aldaǵy aptalarda partııa barlyq óńirde konferentsııalar ótkizip, fılıaldar quryp, olardyń basshylyq organdaryn saılaıdy.
— Bul partııanyń jergilikti jerlerdegi uıymdastyrýshylyq negizin qalyptastyrady. Óńirlik konferentsııalar partııanyń turaqty jumysyn jolǵa qoıyp, qoǵammen baılanysyn nyǵaıtýǵa múmkindik beredi. Biz «Ádilet» tóńiregine belsendi azamattardy, kásipkerlerdi, kásibı qaýymdastyq ókilderin, jastar men qoǵam qaıratkerlerin biriktirýdi kózdeımiz. Partııanyń kadrlyq áleýeti men qoǵam aldyndaǵy bedeli eń aldymen óńirlerde qalyptasady, — dedi Bórihan Nurmuhamedov.
Sezd barysynda partııanyń óńirlik fılıaldary týraly ereje de tanystyryldy. «Ádilet» partııasynyń saıası keńesi quramynyń múshesi Dınara Zákıeva qujattyń Konstıtýtsııaǵa, «Saıası partııalar týraly» zańǵa jáne partııa jarǵysyna sáıkes ázirlengenin aıtty.
— Erejede fılıaldardyń mártebesi, maqsat-mindetteri, qurylymy, partııa múshelerin esepke alý tártibi, sondaı-aq basshylyq jáne baqylaý-tekserý organdarynyń qyzmeti aıqyndaldy, — dedi ol.
Aıta keteıik, partııanyń II sezine 613 delegat tirkeldi. Mandat komıssııasynyń málimetinshe, bul jalpy delegattardyń 99,5%-yn quraıdy.
Eske salaıyq, elordada «Ádilet» partııasynyń II Sezi ótip jatyr.
