«Ádilet» partııasynyń barlyq oblystaǵy fılıal basshylary saılanyp boldy
ASTANA. KAZINFORM - «Ádilet» partııasy oblystyq fılıaldarynyń basshylyq quramyn tolyqtaı jasaqtap boldy. Qazaqstannyń barlyq óńirinde ótken konferentsııalardyń qorytyndysy boıynsha fılıal tóraǵalary, Saıası keńesterdiń músheleri jáne Tekserý komıssııalarynyń quramy saılandy. Bul týraly partııanyń baspasóz qyzmeti habarlady.
Konferentsııalarǵa partııanyń oblystyq, qalalyq jáne aýdandyq fılıaldarynyń basshylary men qyzmetkerleri, sondaı-aq jańadan saılanatyn basshylyq organdardyń músheleri qatysty.
Kún tártibindegi negizgi máselelerdiń biri – Qazaqstan Respýblıkasynyń Prezıdenti Qasym-Jomart Toqaevtyń «Jańa Konstıtýtsııa – Jańa Dáýir» atty úndeýin qoldaý boldy.
Sonymen qatar qatysýshylar partııanyń óńirlik fılıaldarynyń basshylyq organdaryn jasaqtaý máselesin talqylady. Daýys berý nátıjesinde partııanyń barlyq óńirlik fılıaldarynyń basshylyq quramy tolyq bekitildi. Saıası keńesterdiń quramyna 808 adam endi.
Olardyń qatarynda shaǵyn jáne orta bıznes ókilderi – 22,8%, bilim jáne ǵylym salasynyń mamandary – 13%, úkimettik emes uıymdar men kásipodaq ókilderi – 10,2%, mádenıet jáne sport salasynyń ókilderi – 8,9%, ónerkásip salasynyń mamandary – 7,5%, kólik jáne turǵyn úı-kommýnaldyq sharýashylyǵy salasynyń ókilderi – 6,7%, densaýlyq saqtaý qyzmetkerleri – 5,6%, buqaralyq aqparat quraldarynyń ókilderi – 5,4%.
Tekserý komıssııalarynyń quramyna 100 adam saılandy. Olardyń basym bóligi ekonomıka, qarjy, býhgalterlik esep jáne quqyq salalarynda tájirıbesi bar mamandar.
