«Ádilet» partııasy Quryltaı saılaýyna qatysatyn 186 kandıdatty bekitti
ASTANA. KAZINFORM — Astanada «Ádilet» partııasynyń kezekten tys III sezi ótti. Jıynda partııanyń saılaýaldy baǵdarlamasy qabyldanyp, Quryltaı depýtattyǵyna usynylatyn 186 kandıdattyń tizimi bekitildi.
— «Ádilet» partııasy jańa Konstıtýtsııadaǵy qundylyqtar men ustanymdardy qoǵamdyq saıasatqa, jasampaz reformalarǵa jáne ár azamatqa seziletin naqty nátıjelerge aınaldyrýdy tarıhı mıssııasy dep esepteıdi. «Ádilet» partııasy jańa Konstıtýtsııa qundylyqtaryn iske asyrýda jáne jańa konstıtýtsııalyq dáýirde Qazaqstannyń órkendep damýyn qamtamasyz etýde kóshbasshy saıası kúshterdiń biri bolatynyna senimdimiz, — dedi «Ádilet» partııasynyń tóraǵasy Aıbek Dádebaı.
Onyń sózinshe, partııanyń búgingi sezd — osy mıssııany iske asyrýdaǵy mańyzdy oqıǵa.
— Mundaı qabyldanǵan sheshimder bir ǵana partııanyń aldaǵy bes jyldaǵy baǵytyn aıqyndap qoımaıdy, olar elimizdiń jańa dáýirdegi saıası baǵyt-baǵdaryn, tujyrymdamalyq maqsat-muratyn, memleket pen qoǵamnyń úılesimdi damý jolyn aıqyndaıtyn ortaq ustanymdy bildiredi. Jańa ǵana tolyqtyrylyp, jańǵyrtylǵan «Ádilet» partııasynyń jarǵysy, qabyldanǵan saılaýaldy baǵdarlamasy, bekitilgen partııalyq tizim, osynda aıtylǵan oı-tujyrymdar men usynys-tilekter halqymyzdyń seniminen shyǵatyn naqty iske aınalýy tıis. Sondyqtan búgingi sezdiń jaýapkershiligi de, tarıhı mańyzy da erekshe, — dedi Aıbek Dádebaı.
Aıta keteıik, buǵan deıin «Ádilet» partııasy Quryltaı saılaýyna qatysty málimdeme jasaǵanyn jazǵanbyz.
