«Ádilet» partııasy bıznes pen memleket dıalogyn kúsheıtýdi kózdeıdi
ASTANA. KAZINFORM — Óńdeýshi ónerkásipti damytý, memlekettik satyp alý júıesin jetildirý, ishki naryqty qorǵaý jáne otandyq óndirýshilerge qoldaý kórsetý sharalary «Ádilet» partııasy Іskerlik keńesi otyrysynyń negizgi taqyryptaryna aınaldy. Aıbek Dádebaıdyń tóraǵalyǵymen ótken jıynda bıznestiń, salalyq qaýymdastyqtardyń jáne memlekettik organdardyń ókilderi qazaqstandyq óndiristi damytýǵa qajet júıeli ózgeristerdi talqylady. Bul týraly partııanyń baspasóz qyzmeti málim etti.
Otyrysty ashqan Aıbek Dádebaı jańa Konstıtýtsııanyń zańdy kúshine enýimen memleket damýynyń jańa kezeńi bastalǵanyn atap ótti. Onyń aıtýynsha, Ata Zańda bekitilgen qaǵıdattar jańa óndiristerdi iske qosý, jumys oryndaryn ashý jáne otandyq bıznestiń damýyna qolaıly jaǵdaı jasaý arqyly ekonomıkada naqty kórinis tabýy tıis. Keıingi on jylda óńdeýshi ónerkásiptegi óndiris kólemi shamamen 50 paıyzǵa ósip, al onyń jalpy ishki ónimdegi úlesi 10,2 paıyzdan 13 paıyzǵa deıin artty. Kelesi kezeńniń mindeti — ústinen qosylatyn quny joǵary ónim óndiretin óndiristerdi damytý.
— Qosylǵan qun — XXI ǵasyrdyń jańa munaıy. Sondyqtan óńdeýshi ónerkásip týraly áńgime — Qazaqstannyń ekonomıkalyq derbestigi týraly áńgime degen sóz. Intellektini, tehnologııany jáne daıyn ónimdi eksporttaıtyn memleket árdaıym óz bolashaǵyn ózi aıqyndaý isinde áldeqaıda kóp múmkindikke ıe, — dedi Aıbek Dádebaı.
Kún tártibindegi mańyzdy máseleniń biri — memlekettik satyp alý júıesin jetildirý. Іskerlik keńeske qatysýshylardyń pikirinshe, bul júıe otandyq óndiristi damytý isin yntalandyrýy tıis. Bul — jańa jumys oryndaryn ashý jáne jergilikti ónim óndirisin jolǵa qoıý degen sóz. Máselen, Saıası keńes bıýrosynyń múshesi, «Ýnıversal» kompanııasynyń basshysy Zamıra Kýzıeva jetkizýshilerdi tek taýardyń shyǵý tegine qaraı emes, olardyń Qazaqstan ekonomıkasyna qosqan úlesine qaraı baǵalaýdy usyndy.
— Memlekettik satyp alý júıesi tek taýarlar men qyzmetterdi satyp alý tetigine emes, sonymen birge otandyq ónerkásipti damytý quralyna aınalýǵa tıis, — dedi ol.
Al «Kaýstık» AQ-nyń bas dırektory Ermek Toqmaǵambetov qoldaý sharalaryn tolyqtyrýdy usyndy.
Onyń aıtýynsha, kásiporyn otandyq shıkizatty óńdeıdi, ónimdegi lokalızatsııa deńgeıi 95 paıyzdan asady, al óndiristi damytýǵa salynǵan ınvestıtsııa kólemi 100 mıllıon AQSh dollarynan asyp otyr.
— Elishilik qundylyqtar deńgeıin eskere otyryp, óndirýshilerdi sanattarǵa bólý júıesin engizý, sondaı-aq lokalızatsııa deńgeıi joǵary kásiporyndarǵa memleket tarapynan qoldaý kórsetý sharalaryn basymdyqpen usyný qadamdaryn qarastyrý qajet, — dedi Ermek Toqmaǵambetov.
Qatysýshylar ishki naryqty tıimdi qorǵap almaıynsha, lokalızatsııaǵa qoldaý kórsetý múmkin emes ekenin jetkizdi. Qazaqstandaǵy tsement jáne beton óndirýshiler qaýymdastyǵynyń basshysy Ǵylymhan Qalı ulttyq standarttardy jańartý qadamy sapasyz tsement ımportynyń kólemin qysqartýǵa múmkindik bergenin atap ótti.
Al «Adal Taýar» qaýymdastyǵynyń tóraǵasy Gúlmıra Ýahıtova byltyr Qazaqstanda 205 myńnan astam kontrafaktilik ónim birligi anyqtalyp, zańsyz aınalymdaǵy 8,6 mıllıon qorap temeki ónimi tárkilengenin málimdedi.
— Adal eńbek etetin bıznes zańdy qasaqana buzatyndarmen básekelesýge májbúr bolyp otyr Eń negizgi másele — osy, — dedi Gúlmıra Ýahıtova. Іskerlik keńes barysynda aıtylǵan barlyq usynys is júzinde jalǵasyn tabýy tıis.
Aıbek Dádebaıdyń aıtýynsha, árbir ónerkásiptik jobanyń artynda kásipkerler, ınjenerler, jumysshylar jáne olardyń otbasylary tur. Sondyqtan otandyq óndiristi damytý qadamy elimizdiń árbir óńirinde naqty nátıje berýi qajet.
— Konstıtýtsııa normalaryn kásipkerler, ınjenerler, jumysshylar, ınvestorlar jáne árbir qazaqstandyq otbasy naqty sezinetin sheshimderge aınaldyrý mańyzdy, — dedi partııa Tóraǵasy.
Ol QR-kod arqyly onlaın formatta qazaqstandyqtar óz bastamalaryn usynyp, máseleleri týraly habarlaı alatynyn eske saldy. «Ádilet» partııasy Іskerlik keńesi músheleriniń barlyq usynysy aldaǵy ýaqytta júıeli jumys júrgizý maqsatynda Qazaqstannyń ónerkásiptik saıasatynyń Aq kitabyna (White Paper) biriktiriledi. Qujatqa bıznes ókilderiniń bastamalary, sarapshylardyń usynymdary jáne olardy kezeń-kezeńimen júzege asyrý jospary engiziledi.
Eske sala keteıik, «Ádilet» partııasy ótinim qabyldaýdyń tsıfrlyq servısin iske qosty.
