«Ádilet» partııasy alańynda ekonomıkalyq damý jáne zań ústemdigi saralandy
ASTANA. KAZINFORM — «Ádilet» partııasynyń alańynda bıznes ókilderi, ekonomıster, zańgerler men sarapshylar ekonomıkany damytý jáne «Zań men tártip» qaǵıdatyn nyǵaıtý máselelerin talqylady. Sondaı-aq strategııalyq sessııaǵa partııanyń Saıası Keńes Bıýrosy men Saıası keńes músheleri qatysty.
Partııa Tóraǵasy Aıbek Dádebaı ekonomıka men quqyq máselelerin bir-birinen bólip qarastyrý múmkin emes ekenin atap ótti.
— Zań ústemdik etpese ekonomıkalyq erkindik «quqyq kúshtiniń jaǵynda» qaǵıdatyna aınalady. Zań naqty ekonomıkany eskergen jaǵdaıda ǵana júıeli jumys isteıdi, — dedi Aıbek Dádebaı.
Qatysýshylar turǵyndardyń turmysyna tikeleı áser etetin máselelerge erekshe nazar aýdardy. Ekonomıst, Qazaq munaı jáne gaz ınstıtýty bas dırektorynyń keńesshisi Jaqsybek Qulekeev ekonomıkalyq ahýaldy baǵalaý kezinde tek makroekonomıkalyq kórsetkishterge emes, azamattardyń ál-aýqatyn arttyrýǵa baǵyttalǵan sharalarǵa da basa mán berý qajet ekenin aıtty.
— Áleýmettik kórsetkishterge erekshe kóńil bólý qajet. Ekonomıkalyq saıasatty qalyptastyrý barysynda dál osy kórsetkishter aıryqsha oryn alýǵa tıis, — dedi Jaqsybek Qulekeev.
Kóterilgen máselelerdiń sheshimi jekelegen sharalardy emes, keshendi tásildi talap etedi. Sarapshylar osyndaı ortaq pikirge keldi. Mundaı jumys qandaı qaǵıdattarǵa negizdelýi kerek ekenin Qazaqstan ınvestorlary Qaýymdastyǵynyń basshysy Rýstam Júrsinov aıtty.
— Qazaqstan óziniń qýatty tustaryna — energetıkaǵa, metallýrgııaǵa, kólik salasyna, agrarlyq sektorǵa, tabıǵı resýrstarǵa jáne tranzıttik áleýetine súıenýi qajet. Alaıda bul salalardyń básekege qabilettiligi tek tehnologııalar, ónimdilik jáne zamanaýı basqarý arqyly múmkin bolmaq, — dedi ol.
Sondaı-aq Dasco Consulting Group basqarýshy seriktesi Dármen Sádýaqasov, zań ǵylymdarynyń doktory Marat Qoǵamov, Respýblıkalyq advokattar alqasynyń tóraǵasy Mádı Myrzaǵaraev, Parlamentarızm ınstıtýtynyń dırektory Natalıa Pan, Fortune Partners basqarýshy seriktesi Dana Toqmyrzına jáne «Saıat Jolshy jáne Áriptester» zańgerlik kompanııasynyń aǵa seriktesi Arman Berdalın óz usynystaryn ortaǵa saldy. Kezdesýdi qorytyndylaı kele partııa Tóraǵasy Aıbek Dádebaı sarapshylar qaýymdastyǵynyń usynystary ekonomıkany damytýǵa jáne zań ústemdigin nyǵaıtýǵa qajetti praktıkalyq sheshimderdi qabyldaýǵa múmkindik beretinin atap ótti.
— Búgin biz jaı ǵana pikir almasqan joqpyz. Eldiń ekonomıkalyq damýy men quqyqtyq júıesin odan ári jetildirýge qatysty mańyzdy bastamalardy birge talqyladyq, — dep túıindedi Aıbek Dádebaı.
Sarapshylarmen ótken osyndaı kezdesý aldaǵy ýaqytta da partııa jumysynyń barlyq basym baǵyty boıynsha jalǵasady.
Eske sala keteıik, «Ádilet» partııasy bıznes pen memleket dıalogyn kúsheıtýdi kózdeıtinin jazdyq.
