Ádilet Moldahanǵa qatysty sot: Ákimshilik polıtsııanyń eks-basshysy jaýap berdi
ALMATY. KAZINFORM — Almaly aýdandyq sotynda zańger ári bloger Ádilethan Moldahanǵa qatysty sot otyrysy ótip jatyr.
Búgin sot otyrysynda aldymen Serik Shýmaevtan jaýap alyndy.
— Men Іshki ister organdarynda 1999 jyldan beri 27 jyl jumys istep keldim. Ákimshilik polıtsııa basqarmasynyń basshysy laýazymyna deıin jettim. Meniń qyzmettik mindetime patrýldik polıtsııanyń jumysyn uıymdastyrý kiredi. Ál-Farabı dańǵylynda jol apaty 20 naýryzdan 21 naýryzǵa qaraǵan túni boldy. Ol týraly maǵan kezekshi ınspektor habarlady. Saǵat 4 shamasynda oqıǵa ornyna baryp, mán-jaıymen tanystym. Odan keıin úıge qaıtyp kettim. Birneshe kúnnen keıin Ádilethan Moldahan jarııalaǵan beınejazba taraı bastady. Onda aıtylǵannyń barlyǵy maǵan qatysy joq jáne orynsyz dep sanaımyn, — dedi ol.
Sondaı-aq ol aýqatty adamdardyń balalaryna qorǵan bolǵany týraly aqparat jalǵan ekenin aıtty.
— Eshqandaı «zolotaıa molodejdi» qalqalap júrmedim. Bizde Іshki qaýipsizdik qyzmeti bar. Eger meniń tarapymnan zańbuzýshylyq bolǵanda osy ýaqytqa deıin jaýapkershilikke tartylatyn edim, — dedi Serik Shýmaev.
Jábirlenshi Ádilethan Moldahandy jeke tanymaıtynyn, tek bloger retinde bilgenin atap ótti. Sondaı-aq ol advokattardyń suraǵyna jaýap berip, ekinshi jábirlenýshi Erjan Uzabaevqa qatysty aıtylǵan aqparattyń da shyndyqqa janaspaıtynyn aıtty.
«Sizge naqty qandaı nuqsan keldi» degen suraqqa jaýap bergen Serik Shýmaev bul oqıǵa tóńireginde týyndaǵan rezonanstan keıin jumystan ketýge májbúr bolǵanyn aıtyp, qazir jumyssyz otyrǵanyn málimdedi.
Eske salaıyq, Ádilethan Moldahanǵa QR Qylmystyq Kodeksi 274-baby 2-tarmaǵy 3-bóligi boıynsha (kórineý jalǵan aqparat taratý) aıyp taǵyldy. Іs boıynsha jábirlenýshi retinde Almaty qalasy polıtsııa departamenti basshysynyń burynǵy orynbasary Erjan Uzabaev jáne Almaty qalasy polıtsııa departamenti Ákimshilik polıtsııa basqarmasynyń burynǵy basshysy Serik Shýmaev tanyldy.
Búgingi sot otyrysynda prokýror aıyptaý aktisin oqyǵan bolatyn.
Ótken sot otyrysynda jábirlenýshi Uzabaevtyń advokaty Asylbek Ábdiraıymov moraldyq shyǵyn retinde 10 mln teńge jáne sot shyǵyndaryna 1 mln teńge azamattyq talap-aryz qoıǵan edi.
Buǵan deıin Almatyda 1 mıllıonnan astam oqyrmany bar bloger Ádilethan Moldahan ustalǵanyn jazǵanbyz. Ol áleýmettik jelide quqyqtyq saladaǵy beınejazbalarymen tanymal. Ásirese, onyń Ál-Farabı dańǵylynda bolǵan jol apaty jaıly jarııalaǵan beınejazbalary jelide keńinen tarady.
