Ádilet mınıstrligi tsıfrlyq sot oryndaýshy júıesiniń alǵashqy nátıjelerin tanystyrdy

ASTANA. KAZINFORM — Búgin Parlament Májilisindegi Úkimet saǵaty aıasynda uıymdastyrylǵan kórmede Ádilet mınıstrligi tsıfrlyq sot oryndaýshy júıesiniń alǵashqy nátıjelerin tanystyrdy. 

Tsıfrlyq sot oryndaýshy byltyr 20 tamyzda júıege qosylǵan.

— Adamnyń qatysýynsyz, ıaǵnı jeke sot oryndaýshysyz atqarýshy qujattarǵa qatysty talaptardy oryndaıdy. Robot qaryzy bar adamdarǵa habarlama joldap, tıisti shekteýlerdi qoıady. 30 kún ótkennen keıin bereshek adam talaptardy óz erkimen oryndamasa, onda osy júıe isti jeke sot oryndaýshysyna ótkizedi, — dedi QR Ádilet mınıstrligi Májbúrlep oryndatý komıtetiniń basqarma basshysy Іlııas Esalıev.

Onyń aıtýynsha, osy robot jumys istep turǵan aqparattyq júıege barlyq memlekettik jáne jeke sot oryndaýshylary qosylǵan. Jeti aıdyń ishinde tsıfrlyq sot oryndaýshy 650 myń is qozǵap, 176 myńǵa jýyq isti aıaqtaǵan. Memleket paıdasyna 3,5 mlrd teńgege tarta qarajat óndirdi. Sondaı-aq júıeniń aqysyz qyzmetiniń arqasynda, halyqtyń 910 mln teńgesin únemdeldi.

— Tsıfrlyq sot oryndaýshyǵa tek aıyppuldar men salyq bereshegin óndirý týraly qujattar túsedi, ıaǵnı 20 aılyq eseptik kórsetkishke deıin. Qalǵan ister tikeleı jeke sot oryndaýshylaryna baǵyttalady. Tsıfrlyq sot oryndaýshysy aqparattyq júıege qosylǵan jáne onda jasandy ıntellektiniń elementteri bar, — dedi basqarma baıashysy.

Buǵan deıin sot oryndaýshysyna aqsha tóleýden qutqaratyn robotty qalaı paıdalanýǵa bolatynyn jazǵan edik.