Ádilet mınıstrligi sot oryndaýshylaryna talapty qatańdatpaq
ASTANA. KAZINFORM — Ádilet mınıstrligi alıment óndirý kórsetkishin jaqsartý úshin sot oryndaýshylaryna qoıylatyn talaptardy qatańdatpaq. Bul týraly Ádilet vıtse-mınıstri Laýra Mersalımova aıtty.
Senattyń jalpy otyrysynan keıin BAQ ókilderiniń saýalyna jaýap bergen vıtse-mınıstrdiń aıtýynsha, Ádilet mınıstrligi alıment óndirý kórsetkishin jaqsartý úshin únemi júıeli sharalardy qabyldap keledi.
— Qazirgi ýaqytta Májilis sot-atqarýshylyq óndiristi jetildirýge baǵyttalǵan zań jobasyn qarastyryp jatyr. Sot oryndaýshylaryna talap qatańdatylatyn bolady. Munan bólek, Ádilet mınıstrligi retteletin barlyq salany tsıfrlandyrý boıynsha belsendi is-sharalardy júzege asyrýda, — dedi ol.
Taıaýda Ádilet mınıstrliginiń Májbúrlep oryndatý komıteti sońǵy ýaqytta ózin sot oryndaýshysy retinde tanystyryp, mınıstrliktiń emblemasyn zańsyz paıdalanatyn jaǵdaılar jıilegenin eskertken edi.