Ádilet mınıstrligi májbúrlep oryndatý nátıjelerin jarııalady
ASTANA. KAZINFORM – Májbúrlep oryndatýdy memlekettik jáne jeke sot oryndaýshylar, sondaı-aq ońaılatylǵan is júrgizý sheńberinde tsıfrlyq sot oryndaýshylar júzege asyrady. Bul jóninde QR Ádilet mınıstrligi Májbúrlep oryndatý komıtetiniń tóraǵasy Maqsat Balabekov Ortalyq kommýnıkatsııalar qyzmetinde ótken brıfıngte málimdedi.
– Ótken jyly atalǵan sot oryndaýshylar 15,5 trıllıon teńgelik 10 mıllıonǵa jýyq qujatty qarady. Óndirip alýshylardyń paıdasyna óndirilgen soma – 557,6 mlrd teńge. Bul 2024 jylmen salystyrǵanda, 88,6 mıllıard teńgege joǵary. Memlekettik kiris retinde 63,4 mıllıard teńge óndirildi. Bul kórsetkish 2024 jylmen salystyrǵanda 10%-ǵa ósti, - dedi ol.
Sonymen qatar M. Balabekov 2025 jylǵa qatysty basqa da statıstıkalyq málimetterge toqtaldy.
– Memlekettik sot oryndaýshylar men memleket paıdasyna 3,4 mlrd teńge atqarýshylyq sanktsııa óndirildi. Bul kórsetkish 2024 jyldan 30%-ǵa ósti. Tsıfrlyq sot oryndaýshysy ońaılatylǵan is júrgizý arqyly 10 mlrd teńgege jýyq qarjy óndirdi. Ońaılatylǵan óndiris sheńberinde jeke sot oryndaýshysynyń qyzmetine 25% tólem tólenbeıtinin eskersek, azamattar 2,4 mlrd teńge qarajatyn únemdedi, - dedi ol.
Aıta keteıik buǵan deıin Parlament Májilisinde alıment óndirip alý jónindegi qujat qaralatynyn jazǵanbyz.
