Ádilet mınıstrligi el aýmaǵynda Tsıfrlyq sot oryndaýshyny iske qosty
ASTANA. KAZINFORM – Bul júıe azamattardyń 5 mıllıard teńgeden astam qarajatyn únemdeýge múmkindik beredi.
Mundaı múmkindik Ádilet mınıstrliginiń bastamasymen jeńildetilgen óndiristiń jańa ınstıtýty aıasynda halyq ıgiligine usynylyp otyr.
Memleket basshysynyń tapsyrmasy boıynsha azamattardyń kredıttelýin tómendetý jáne ádilet organdarynyń jumysyn odan ári tsıfrlandyrý boıynsha zańnamaǵa tıisti ózgerister engizildi.
«Buryn qaryzdy ýaqtyly ótemegen jaǵdaıda, azamattar jeke sot oryndaýshynyń qyzmeti úshin aıyppul somasyna qosymsha 25% qarajat tóleýge mindetti bolǵan. Endi azamattar osy shyǵyndardan jáne JSO-na barýdan bosatylady. Máselen, 20 AEK-ke deıingi somadaǵy ońaılatylǵan óndiriske azamattar EGOV Mobile-da is týraly egjeı-tegjeıli aqparaty bar 1414-ten SMS habarlamalar men push-habarlamalar alatyn bolady.
Halyqqa yńǵaıly bolý úshin barlyq qamtamasyz etý sharalaryn (tyıym salý) avtomatty túrde alyp tastaı otyryp, bereshekti onlaın tóleý qoljetimdi. Osylaısha, adamı faktor tolyǵymen alynyp tastalady», — dep túsindirdi mınıstrlikten.
Aldyn ala esepteýler boıynsha jeke sot oryndaýshylaryna qyzmet aqysynyń 25% alyp tastaý esebinen jyl saıyn azamattardyń qarjylyq júktemesi shamamen 5,5 mlrd. teńgege tómendeıdi degen boljam bar.
Osylaısha sot oryndaýshylarymen baılanysýdyń qajeti joq, barlyq áreketter onlaın rejıminde júrgiziledi jáne óndiristi toqtatý jáne qamaýǵa alýdy alyp tastaý úshin túbirtekter men basqa da rastaıtyn qujattardy usynýdyń qajeti joq.
Aıta ketý kerek, kúntizbelik 30 kún ishinde atqarýshylyq qujattyń (ońaılatylǵan is júrgizý boıynsha) talaptary oryndalmaǵan jaǵdaıda, is jeke sot oryndaýshysyna oryndaýǵa beriletin bolady jáne odan keıingi atqarýshylyq áreketter komıssııany óndirip ala otyryp, jalpy tártippen júzege asyrylady.
Esterińizge sala keteıik, aǵymdaǵy jyldyń 18 qańtarynan bastap bul joba Taraz qalasy boıynsha synaqtan ótkizilip, azamattardyń aqshalaı mindettemelerin tómendetý, qaǵaz tasyǵyshtan tolyq bas tartý jáne Atqarýshylyq is júrgizýdi oryndaý protsesinde adamı faktordy alyp tastaý túrinde oń nátıje kórsetti.
