Ádilet mınıstrligi azamattardy jalǵan sot oryndaýshylardan saqtandyrdy

ASTANA. KAZINFORM – Ádilet mınıstrliginiń Májbúrlep oryndatý komıteti azamattardy alaıaqtardyń sot oryndaýshysy retinde ózin tanystyryp, jalǵan áreketterge barýy jıilep ketkenin eskertti.

Vedomstvonyń málimetinshe, alaıaqtar Ádilet mınıstrliginiń emblemasyn zańsyz paıdalanyp, azamattardy esepshottardy buǵattaýmen, múlikke tyıym salýmen qorqytyp, «bereshekti» tez arada tóleýdi talap etedi.

Komıtet azamattarǵa mundaı aıla-tásilderge aldanbaýǵa keńes beredi. Atqarýshylyq is júrgizýdiń bar-joǵyn árkim óz betinshe resmı derekkózder arqyly teksere alady:

– https://aisoip.adilet.gov.kz saıtyndaǵy «Boryshkerler men tyıym salýlar tizilimi» nemese «Atqarýshylyq qujatty izdeý» bóliminen;
– jeke ETsQ arqyly «Taraptar kabıneti» servısinen;
– «Azamattarǵa arnalǵan» bólimindegi baılanys derekterin paıdalanyp, sot oryndaýshysyna tikeleı qońyraý shalý arqyly;
– «Adilet» mobıldi qosymshasy arqyly.

Sonymen qatar qosymsha aqparatty Ádilet mınıstrliginiń resmı saıtynan jáne Jeke sot oryndaýshylarynyń respýblıkalyq palatasynyń portalynan bilýge bolady.

«Zańsyz áreketterdiń aldyn alý úshin tek resmı derekkózderge sený qajet. Derbes derekterdi úshinshi tulǵalarǵa nemese kúmándi ınternet-resýrstarǵa bermeńizder», – delingen komıtet habarlamasynda.

Azamattar quqyqtyq keńesti 119 nómiri boıynsha Sall-ortalyqtan (Qazaqstan aýmaǵyndaǵy statsıonarlyq telefondardan tegin), 119 Kenesbot telegram-arnasynan nemese QR «Ádilet» aqparattyq-quqyqtyq júıesiniń saıtyndaǵy «Vırtýaldy keńesshi» aıdarynan ala alady.

Aıta keteıik, buǵan deıin Balalardyń quqyǵyn qorǵaý komıteti alaıaqtyq týraly eskertti.