Ádilet mınıstrligi avtorlarǵa syıaqy nege tólenbeı otyrǵanyn túsindirdi
ASTANA. KAZINFORM — Zııatkerlik menshik salasyndaǵy Biryńǵaı tsıfrlyq platformaǵa engizilgen týyndylardyń tek 4%-y týraly avtorlyq syıaqyny bólýge qajetti tolyq málimet bar. Bul týraly Ortalyq kommýnıkatsııalar qyzmetinde ótken brıfıngte QR Ádilet vıtse-mınıstri Botagóz Jaqselekova aıtty.
Onyń málimetinshe, qazir platformaǵa 164 myńnan astam týyndy engizilip, 15 myńǵa jýyq quqyq ıelenýshi tirkelgen.
— Týyndylardyń tek 4%-y boıynsha ǵana tolyq málimet bar, ıaǵnı Biryńǵaı tsıfrlyq platformaǵa engizilgen barlyq týyndynyń shamamen 7 myńy týraly derek tolyq. Máselen, búkil elge tanymal, platformadaǵy top-chartta birinshi orynǵa shyqqan Alem-niń oryndaýyndaǵy «Kúıim» áni bir aıda 30 telearna men 25 radıostantsııadan 2 myńǵa jýyq ret berilgen. Alaıda Biryńǵaı tsıfrlyq platformada týyndy týraly tolyq málimet joq bolǵandyqtan, oǵan tıesili syıaqyny bólý múmkin bolmaı tur, — dedi ol.
Vıtse-mınıstrdiń aıtýynsha, avtorlyq syıaqynyń ári qaraı bólinýi platformaǵa engizilgen málimetterdiń tolyq ári durys bolýyna baılanysty.
Ol avtorlar men quqyq ıelenýshilerdi týyndylar týraly málimetterdi tolyqtyrýǵa shaqyrdy. Aqparatty avtorlyq qoǵamdar arqyly nemese platformadaǵy jeke kabınetten derbes engizýge bolady. Atap aıtqanda, týyndy, quqyq ıelenýshilerdiń úlesi, ISRC kody jáne syıaqy alýshylardyń sáıkestendirý nómirleri týraly málimet qajet.
Aıta keteıik, buǵan deıin vıtse-mınıstr Biryńǵaı tsıfrlyq platforma qalaı jumys isteıtinin aıtyp ótti.
