Ádilet mınıstrligi avtorlardyń quqyǵyn buzatyn karaoke-barlardy jappaı teksere me – Talǵat Ýálıdiń jaýaby
Ádilet mınıstrliginiń resmı ókili Talǵat Ýálı avtorlardyń quqyǵyn buzatyn karaoke-barlardy jappaı tekserýge qatysty pikir bildirdi, dep habarlaıdy Kazinform.
«Kúni keshe keıbir buqaralyq aqparat quraldarynda «Ádilet mınıstrligi karaoke-barlarda aıtylatyn ánder úshin jappaı tekseris júrgizip, avtorlyq quqyqtyń buzylǵany týraly hattama toltyryp, aıyppul salady» degen aqparat tarady. Bul aqparat sál burmalanǵan», - dedi resmı ókil.
Onyń atap ótýinshe, karaoke-barlarda oryndalatyn án úshin avtormen kelisim jasalyp, 3 AEK mólsherinde jarnasy tólenýi kerek. Sodan keıin ǵana oryndaýǵa bolady. Tipti, bul úshin Qylmystyq kodeks aıasynda jaýapkershilik te qarastyrylǵan.
«Biraq Ádilet mınıstrligi «karaoke-barlardy tekseredi, jabady, qysym kórsetedi» degen áńgime shyndyqqa janaspaıdy. Kerisinshe qazir Ádilet mınıstrligi avtorlyq quqyqtyń buzylýyn Qylmystyq kodeksten Ákimshilik kodekske aýystyrýǵa, ıaǵnı qylmys dep tanymaýǵa belý býyp otyr. 2024 jyldan bastap osy jumystarǵa kirisedi. Qandaı da bir avtorlyq quqyq buzylsa, onda ákimshilik jaýapkershilik qarastyrylatyn bolady. Al karaoke-barlarǵa qatysty Ádilet mınıstrligi qandaı da bir tekserý ótkizbeıdi. Degenmen qoǵamdyq jerde án ne shyǵarma oryndalyp, sol týyndynyń avtory quqyǵynyń buzylǵandyǵyn aıtyp, Ádilet mınıstrligine shaǵymdansa, onda zań aıasynda tekseris júrgiziledi. Karaoke-barlarda kóbine halyq ánderi, jekelegen avtorlardyń ánderi oryndalady. Eger án avtorynyń qaıtys bolǵanyna 70 jyldan astam ýaqyt ótken bolsa, ol halyqtyń qazynasy retinde tanylyp, oryndalǵany úshin eshqandaı aıyppul salynbaıdy», - dedi Talǵat Ýálı.
