Ádilet mınıstrligi alaıaqtyqtyń jolyn qalaı kesýge bolatyndyǵyn túsindirdi

ASTANA. KAZINFORM – Elimizde alaıaqtyq jaǵdaılary jıilep barady. Bul týraly Ádilet mınıstrliginiń resmı ókili Talǵat Ýálı aıtty.

«Aalaıaqtyq jaǵdaılary jıilep ketkenin habarlaǵym keledi. Jalǵan qyzmetkerler sot oryndaýshysy bolyp azamattardan qaryzdy óteýdi talap etip, shottardy jáne múlikti buǵattaý týraly habarlaýda. Eger sizge osyndaı qońyraý tússe nemese habarlama kelse, aqparatty Ádilet mınıstrliginiń, respýblıkalyq nemese óńirlik jeke sot oryndaýshylar palatasynyń resmı saıttarynda óz betińizshe tekserip, qajet bolǵan jaǵdaıda bankke qońyraý shalýdy usynamyz», - dedi Talǵat Ýálı.

Onyń aıtýynsha, atqarýshylyq is júrgizýdiń bar-joǵy týraly málimetterdi tekserý úshin ınternet jelisine Atqarýshylyq is júrgizý organdarynyń avtomattandyrylǵan aqparattyq júıesi dep jazyp, «Boryshkerler men tyıymdar tizilimi» batyrmasyn tańdap, óz JSN-ińizdi engizýińiz. Osyǵan uqsas izdeýdi «AIS OIP» qosymshasy arqyly júzege asyrýǵa bolady.

«Eger boryshker bolsańyz, onda qaryzyńyz týraly aqparat, sot oryndaýshysynyń aty-jóni jáne onyń telefony kórsetiledi. Al boryshker bolmasańyz, onda qyzǵylt sary túspen «Suranys boıynsha eshteńe tabylmady» degen jazý shyǵady. Bul shottaryńyz ben múlikterińizge eshkim tyıym salmaǵanyn jáne sala almaıtynyn bildiredi. Tek resmı derekkózderge senińiz, belgisiz adamdarǵa derekterdi bermeńiz», - dedi ol.