Ádilet mınıstri jekelegen aýmaqtarǵa arnaıy mártebe berý múmkindigin Konstıtýtsııaǵa engizýdi usyndy
ASTANA. KAZINFORM – Jekelegen aýmaqtarǵa arnaıy mártebe berý múmkindigi týraly normany Qazaqstan Respýblıkasynyń Konstıtýtsııasyna engizý qajet. Bul týraly Konstıtýtsııalyq reforma jónindegi komıssııanyń birinshi otyrysynda Ádilet mınıstri Erlan Sársembaev aıtty.
– Konstıtýtsııa – memlekettiń Negizgi zańy ǵana emes, árbir azamatqa arnalǵan qoǵamdyq kelisim qujaty ekenin atap ótkim keledi. Sondyqtan onyń túsinikti tilde jazylǵany mańyzdy. Konstıtýtsııanyń mátini zańı aıqyn, mazmun tereńdigine nuqsan keltirmeı, barynsha túsinikti ári qoljetimdi tilde jazylýy tıis. Tujyrymdardyń qıyndyǵy men tym kúrdelenýi olardyń qabyldanýyn qıyndatyp, Negizgi zań men qoǵam arasyndaǵy baılanysty báseńdetedi. Konstıtýtsııalyq erejeler aıqyn, qısyndy jáne stılıstıkalyq turǵydan durys bolýy tıis. Konstıtýtsııa tiliniń túsinikti bolýy tikeleı Konstıtýtsııanyń ústemdigi qaǵıdatyn iske asyrýmen baılanysty. Azamat negizgi zańnyń mazmunyn túsinip, onda bekitilgen quqyqtar, bostandyqtar men mindetterdi sanaly túrde uǵynýy tıis, sonda ǵana ony qadirlep, saqtaıtyn bolady, - dedi mınıstr.
Osy rette ol ótken jyldyń qyrkúıek aıynda Memleket basshysy Alataý qalasyna ozyq damý qalasy mártebesin beretin Jarlyqqa qol qoıǵanyn atap ótti. Aldaǵy ýaqytta mundaı mártebeni jeke konstıtýtsııalyq zańmen bekitý kózdelip otyr.
Mınıstr Ata zańymyzǵa jekelegen aýmaqtarǵa arnaıy mártebe berý múmkindigin bekitý qajet dep sanaıtynyn basa atap ótti.
– Mundaı mártebe basqarý men quqyqtyq retteýdiń erekshe sharttaryn kózdeýi tıis jáne ol negizdelgen ári ýaqtyly qabyldanatyn sheshim bolýy qajet. Bul, óz kezeginde, quqyq qoldaný praktıkasynyń turaqtylyǵyn, qabyldanatyn sheshimderdiń ınstıtýtsıonaldyq ornyqtylyqty qamtamasyz etýge múmkindik beredi. Arnaıy aýmaqtyq rejımderdiń qalyptasýy memlekettik qurylymnyń negizderin jáne jarııa bılik júıesin qozǵaıtynyn eskerý qajet. Bul oraıda Konstıtýtsııalyq zań qabyldaý arqyly jekelegen aýmaqtarǵa arnaıy mártebe berý múmkindigi týraly normany Qazaqstan Respýblıkasynyń Konstıtýtsııasyna engizýdi usynamyn, - dedi Erlan Sársembaev.
Buǵan deıin vıtse-prezıdentke qoıylatyn talaptardyń úlgisi jarııalanǵanyn jazǵan edik.