Ádilet mınıstri jańa partııalardy tirkeýge qatysty pikir aıtty
ASTANA. KAZINFORM – Ádilet mınıstri Erlan Sársembaev aldaǵy referendým qarsańynda partııa retinde tirkelýge ótinim bergender bolmaǵanyn aıtty.
Búgin Parlament Májilisiniń jalpy otyrysynan keıin tilshiler aldaǵy referendým qarsańynda tirkelýge ótinim bergen jańa partııalar týraly surady.
- Saıası partııalarǵa toqtalsaq, qazirgi kezde elde jeteýi tirkelgen. Al tirkeýge ótinim bergen basqa partııalar joq, - dedi Erlan Sársembaev.
Atap aıtqanda, Memleket basshysy 2026 jylǵy 15 naýryzda respýblıkalyq referendým ótkizý týraly Jarlyqqa qol qoıdy.
Jalpyhalyqtyq referendýmǵa shyǵarylǵan jańa Konstıtýtsııa jobasy qabyldanǵan jaǵdaıda, Ata zańnyń naqty qashan kúshine enetini anyq jazylǵan.
Naqtyraq aıtqanda, respýblıkalyq basylymdarda jarııalanǵan jańa Konstıtýtsııa jobasynyń 95-babynda 1995 jylǵy 30 tamyzdaǵy Qazaqstan Respýblıkasynyń Konstıtýtsııasyna sáıkes qalyptastyrylǵan Qazaqstan Respýblıkasynyń Parlamenti óz ókilettigin 2026 jylǵy 1 shildeden bastap toqtatatyny jazylǵan.
Al Konstıtýtsııa kúshine engen kúnnen bastap bir aı ishinde Qazaqstan Respýblıkasynyń Prezıdenti Quryltaı saılaýyn jarııalaıdy jáne ol eki aı ishinde ótkiziledi.