Ádilet mınıstri norma shyǵarý salasynda qosymsha biliktilik talaptaryn belgileýdi usyndy

ASTANA. KAZINFORM – Norma shyǵarý salasynda tájirıbeniń bolýy týraly qosymsha biliktilik talaptaryn belgileý múmkindigin pysyqtaý qajet. Bul týraly Senatta ótip jatqan parlamenttik tyńdaýda Ádilet mınıstri Erlan Sársembaev aıtty.

- Zań qyzmetterine keletin bolsaq, olar, árıne, quqyqtyq memleket qurýdyń negizgi býyny sanalady. Búgingi kúni norma shyǵarý qyzmetiniń sapasyna qatysty júıeli máseleler bar. Sondaı-aq memlekettik organdarǵa ákimshilik talaptardyń joǵary deńgeıi saqtalyp otyr, - dedi mınıstr.

Onyń atap ótýinshe, osyǵan baılanysty, Ádilet mınıstrligi nazaryn eki negizgi baǵytqa aýdaryp otyr:

- boljamdy-taldamalyq jumysty jáne zań saraptamasyn túbegeıli kúsheıtý;

- aldyn alý sharalaryn ázirleı otyryp, sot jáne quqyq qoldaný praktıkasyn júıeli túrde taldaý.

- Dáıekti norma shyǵarý qyzmetin qamtamasyz etý jolynda birinshi qadam jasaldy – quqyqtyq monıtorıng Konstıtýtsııalyq sottyń quqyqtyq ustanymdaryna erekshe nazar aýdara otyryp, zańnama salalarynyń tıimdiligin taldaýǵa qaıta baǵyttaldy. Óz kezeginde, memlekettik organdar qabyldaıtyn sheshimderdiń zańdylyǵy men birkelkiligin qamtamasyz etý qajet. Bul másele boıynsha Memleket basshysy Qasym-Jomart Toqaev naqty mindet qoıdy – ákimshilik tájirıbeni júıeli túrde taldaý jáne jaýapkershilikti sottarǵa júktemeı, proaktıvti sharalar qabyldaý. Atalǵan baǵyttarda zań qyzmetteriniń róli asa mańyzdy. Óıtkeni olarǵa vedomstvonyń ishinde úılestirý men quqyqtyq qamtamasyz etý júktelgen, - dedi ol.

Mınıstr kadrlyq áleýet týraly aıta kele qazir zań qyzmetteriniń basshylaryna olardyń qyzmetiniń ereksheligin eskermeıtin jalpy biliktilik talaptary belgilengenine toqtaldy.

- Bizdiń oıymyzsha, bazalyq quqyq qoldanýǵa baǵyttalǵan jumys tájirıbesi norma shyǵarýdaǵy tájirıbege teń kelmeıdi. Óıtkeni ol memlekettik saıasatty tikeleı iske asyrýdy bildiredi – bul tek tereń bilimdi ǵana emes, tıisti quzyrettilik pen biliktilikti talap etedi. Osyǵan baılanysty norma shyǵarý salasynda tájirıbeniń bolýy týraly qosymsha biliktilik talaptaryn belgileý múmkindigin pysyqtaý usynylady, - dedi Erlan Sársembaev.

Aıta keteıik, búgin Senatta sot jáne quqyq qorǵaý júıeleriniń, sondaı-aq norma shyǵarmashylyq qyzmettiń sapasyn arttyrý maqsatynda memlekettik organdardyń zań qyzmetteriniń kadrlyq áleýetin nyǵaıtý aıasynda zań bilimin damytý máseleleri boıynsha parlamenttik tyńdaý ótti. Onda Ádilet mınıstrli zań klınıkalaryn damytý boıynsha túbegeıli reformalar júrgizý qajettigin aıtqan edi.