Ádilet mınıstri dinı neke qııý rásimine qatysty pikir aıtty

ASTANA. KAZINFORM — QR Ádilet mınıstri Erlan Sársembaev zań talaptary boıynsha neke qııýǵa ekpin qoıylǵanyn aıtty.

Búgin Parlament Májilisindegi baspasóz máslıhatynda tilshiler dinı jolmen qıylǵan nekelerdi zańsyz etýge qatysty sheshim qabyldaý múmkindigi jóninde surady.

- Biz Konstıtýtsııaǵa sáıkes zaıyrly memleketpiz. Memleket din máselesinen bólingen, sondaı-aq din de memleket máselesinen bólek. Sondyqtan «Neke (erli-zaıyptylyq) jáne otbasy» Kodeksinde biz neke týraly dástúrli kózqarastardy ustanamyz. Bul turǵyda ony qaıta qaraý nemese dinı kózqarastarmen aralastyrý qarastyrylmaǵan, - dedi E. Sársembaev.

Vedomstvo basshysynyń aıtýynsha, eger resmı nekege turmaǵandar keıin ajyrassa da, ortaq balalarynyń alıment máselesin zańmen sheshýge bolady.

Aıta keteıik, «Neke (erli-zaıyptylyq) jáne otbasy» Kodeksiniń 2-babyna sáıkes, tek memlekettik organdar qıǵan neke ǵana tanylady. Dinı joralǵylar men rásimder boıynsha qıylǵan neke (erli-zaıyptylyq) tirkeýshi organdarda tirkelgen nekege (erli-zaıyptylyqqa) teńestirilmeıdi jáne tıisti quqyqtyq saldarlar týdyrmaıdy.

Eske salsaq, Astana qalasyndaǵy Yryskeldi meshitiniń bas ımamy Nurlan Baıjigituly nekeni meshit pen AHAT-ta qıǵyzýdyń aıyrmashylyqtary týraly pikir bildirdi.