Ádilet mınıstri boryshkerlerdiń múlkin aýktsıonda satý kezindegi «sur shemany» atady

ASTANA. KAZINFORM — Boryshkerlerdiń ózge de kiris kózderin anyqtaýǵa agregator-saıttar kómektesedi.

Bul týraly Ádilet mınıstri Erlan Sársembaev málim etti.

— Boryshkerlerdiń múlkin aýktsıonda satý máselesi ashyq kúıinde qalyp otyr. Tyıym salynǵan múlikti satý tájirıbesi adamdar negizsiz paıda tabatyn «sur shemalardyń» bar ekendigin kórsetti. Tyıym salynǵan múlikti tómen baǵamen satyp alý maqsatynda adamdar satyp alý nıetinsiz joǵary baǵany usyna otyryp, aýktsıondy maqsatty túrde buzady. Mundaı qatysýshyny júıe satyp alýshy dep tanyǵannan keıin, osy satyp alýshy somany engizýden bas tartady. Osylaısha 1-shi aýktsıon múliktiń qunyn kóterý ádisimen ótpedi dep tanylady jáne múlik 2-shi aýktsıonǵa tómendetý ádisimen beriledi. Múlikti tómen baǵamen satý boryshkerdiń múddelerine aıtarlyqtaı nuqsan keltiredi, óıtkeni múlikti satý aıyrmashylyǵyn óteý aýyrtpalyǵy odan ári boryshkerdiń moınyna túsedi, — dedi dedi E. Sársembaev Parlament Májilisinde jeke sot oryndaýshylary ınstıtýtynyń problemalary taqyrybyna arnalǵan Úkimet saǵatynda.

Onyń aıtýynsha, jer ýchaskesin alyp qoıý týraly atqarýshylyq qujattar boıynsha oryn alatyn qıynshylyqtar bar. Zańnamaǵa sáıkes, jer ýchaskesi baǵalaý qunynan tómen bolýy múmkin kadastrlyq (baǵalaý) qunymen ótkizýge jatady. Sonymen qatar, múddeli adamdar óte qysqa ýaqyt ishinde qadamdardy rastaýǵa kómektesetin arnaıy tsıfrlyq baǵdarlamardy paıdalanady.

— Mysaly, Astana qalasynda saýda-sattyq kezinde aýktsıon jeńimpazy múliktiń qunyn 0,2 sek nemese 1 sek ishinde rastaǵan. Nátıjesinde, múlik nebári 7,5 mln teńgege satyldy, bul naryqtyq qunynan 13 ese tómen, ıaǵnı múliktiń quny 100 mln teńge shamasynda. Osyǵan uqsas mysal Aqmola oblysynda anyqtaldy. Onda dál osyndaı shemamen 2 mln teńgege jer ýchaskesi ótkizilgen, bul múliktiń baǵalaý qunynan 15 ese az. Osyndaı negizsiz «baıytý» jaǵdaılaryn joıýǵa baǵyttalǵan is-qımyldar daıarlandy, ıaǵnı qatysýshylar teń baǵa usynatyn jaǵdaıda múliktiń quny kóterilýge jatatyn zańnamalyq túzetýler ázirlendi. Sonymen qatar, túzetýler aýktsıon jeńimpazy tólem jasaýdan bas tartqan kezde, aldyńǵy baǵa usynysyn rastaǵan qatysýshylarǵa múlikti satyp alýdy usyný múmkindigin kózdeıdi, — dedi vedomstvo basshysy.

Budan buryn habarlanǵandaı, Ádilet mınıstrligi tsıfrlyq sot oryndaýshy júıesiniń alǵashqy nátıjelerin tanystyrdy.