Ádilet mınıstri ataýy «kógildir» klýbtyń taǵdyry ne bolǵanyn aıtty

Ádilet mınıstri Azamat Esqaraev BAQ ókilderimen ótken brıfıngide ataýyn beıádep sózben qoıǵan jaýapkershiligi shekteýli seriktestiktiń taǵdyry ne bolǵanyn aıtty, dep habarlaıdy Kazinform agenttigi.

«Iá, habardarmyz. Biz birden áreket ettik. Jarty kúnniń ishinde tıisti aımaqtyń departamenti sotqa júginip, kásiporyndy jaýyp tastady. Biz munyń sebepterin de anyqtadyq. Zańdy tulǵalardy qurý týraly zańnamany jeńildetken kezde azdaǵan ǵana aqshamen onlaın formatta kompanııa ashýǵa múmkindik usynylǵan eken», - dedi ol jýrnalıst suraǵyna bergen jaýabynda.

Mınıstr kompanııany qalaı ataý árkimniń óz erkindegi sharýa ekenin aıtady.

«Ádilet departamenti ony teksermeıdi. Kompanııany, bilýimshe, «Azamattarǵa arnalǵan úkimet» kommertsııalyq emes aktsıonerlik qoǵamy arqyly tirkeýge bolady. Mine, bul jeńildik is júzinde bizdiń mentalıtetimizge de, mádenıetimizge de sáıkes kelmeıtin kásiporynnyń paıda bolýyna aparyp soqty. Biz birden shara qabyldap, ony jaýyp tastadyq. Biz qazir zańdy tulǵalardy tirkeý jónindegi zańnamany jetildirýdi pysyqtap jatyrmyz», - dedi Azamat Esqaraev.

Aıtýynsha, azamattarǵa zańnamada mundaı áreket úshin qandaı da bir aıyppul sanktsııasy qarastyrylmaǵan.

«Ókinishke qaraı, zańnama bul turǵyda naqty tyıym salýdy kózdeıdi dep aıta almaımyn. Biz zańnamany memleketterdi, kásiporyndardy, zańdy tulǵalardy qurý máselesin baqylaýdy kúsheıtý turǵysynan pysyqtap jatqanymyzdy aıttym, Jaýapkershilik máselesin shynymen qarastyrý qajet. Múmkin adam shynymen ázil úshin osyndaı zańdy tulǵany qurýǵa bastama qylǵan shyǵar. Meniń túsinýimshe, qoǵam bul ıdeıany qatty unatpady», - dedi Ádilet mınıstri.

Eske salsaq, birneshe aı buryn BAQ-ta ataýy beıádep sózderden quralǵan klýb týraly málimet taraǵan bolatyn.