Ádilet Barmenqulov QFF qarjysyn jymqyrý kúdigine ilingen joq - agenttik

ASTANA. KAZINFORM – Qazaqstan fýtbol federatsııasyna qatysty qylmystyq is tergelip jatyr. Qazaqstan fýtbol federatsııasynyń burynǵy basshysy Ádilet Barmenqulov osy iste kúdikti retinde qarastyrylmaǵan. Bul týraly Qarjylyq monıtorıng agenttigi tóraǵasynyń orynbasary Jeńis Elemesov málim etti.

Búgin Senattyń jalpy otyrysynan keıin tilshiler Qazaqstan fýtbol federatsııasyndaǵy tergeý is-qımyldaryna qatysty suraq qoıdy.

- Bizde jymqyrý deregi boıynsha Qazaqstan fýtbol federatsııasyna qatysty qylmystyq is bar. Qazirgi ýaqytta sotqa deıingi tergeýdiń basqa derekterin aıta almaımyn. Men tek prokýratýramen kelisilgen sotqa deıingi tergeý derekterin ǵana jarııalaı alamyn... Barmenqulovty kúdikti retinde qarastyrmadyq, - dedi J. Elemesov Senattyń jalpy otyrysynan keıin tilshiler suraǵyna jaýap bere otyryp.

Eske salsaq, Bas prokýratýra QFF-nyń burynǵy basshylyǵy kezindegi zań buzýshylyqtardy anyqtady. Federatsııa men birneshe fýtbol klýbyna júrgizilgen prokýrorlyq tekserý nátıjesinde basqarýdaǵy tıimsizdik pen 3 mlrd teńge kóleminde qarjylyq zań buzýshylyqtar anyqtaldy.

Aıta ketsek, byltyr kúzde Qazaqstan fýtbol federatsııasynyń baspasóz qyzmeti Ádilet Barmenqulovtyń federatsııa prezıdenttiginen ketkenin málim etken edi.