«Ádildik joly» azamattardyń quqyqtyq saýattylyǵyn arttyrý maqsatynda «Zań ústemdigi» jobasyn bastady
«Ádildik joly» RQB búginnen bastap elimizdiń barlyq óńirinde zań buzýshylyqtardy aldyn alyp, qazaqstandyqtardyń quqyqtyq saýattylyǵyn arttyrý maqsatynda «Zań ústemdigi» jobasyn iske qosty, dep habarlaıdy Kazinform.
Jobanyń negizgi maqsaty – qoǵamda sybaılas jemqorlyqtyń barlyq kórinisterine tózbeýshilik ortasyn qalyptastyrý jáne de osy protseske el azamattaryn jappaı tartý. Bul joba Memleket basshysy atap ótken «Adal azamat» tujyrymdamasyn júzege asyrý men qoǵamdaǵy zań jáne quqyqtyq tártip ústemdigin qalyptastyrýdaǵy naqty qadamdardyń biri bolmaq.
«Biz quqyq buzýshylyq jasaý, para berý nemese álsizge qolyn kóterý týraly oıdyń ózin aıyptaıtyn qoǵamǵa aınalýymyz kerek. Bul qıyn jumys, biraq bul joldy eńserýimiz qajet. «Ádildik joly» komandasy 2 jyl boıy belsendi jumys istep, qoǵamda quqyqtyq saýattylyq boıynsha olqylyqtar bar ekenine kóz jetkizdi. Osy ýaqyt aralyǵynda adildik.kz saıty men 1463 baılanys ortalyǵyna túsken 8 myńǵa jýyq azamattyń ótinishin qarastyra kele, halyqtyń zań men ereje týraly bilimderin arttyrý arqyly kóp máseleni qylmysqa aparmaı sheshýge bolatynyna senimdimiz», - dep atap ótti «Ádildik joly» RQB atqarýshy dırektory Dıdar Smaǵulov.
«Ádildik joly» birlestiginiń jumysynyń arqasynda 1 206 tulǵa túrli zań buzýshylyq úshin ákimshilik jaýapkershilikke tartylyp, aıyppul tóledi. 800 mln teńgeden astam qarajat bıýdjetke qaıtaryldy. 76 qylmystyq is qozǵaldy.
Al «Zań ústemdigi» jobasyna elimizdiń kez kelgen azamatynyń qatysý múmkindigi bar. Árbir turǵyn sybaılas jemqorlyq faktileri (kez kelgen saladaǵy) men basqa da máselelerin 1463 Call-ortalyǵy nemese Adildik.kz saıty arqyly habarlap, óz saýaldary boıynsha quqyqtyq keńester men kómek ala alady.
«Elimizdiń bolashaǵyna beıjaı qaramaıtyn barlyq azamatty sybaılas jemqorlyqqa qarsy kúreske belsendi atsalysýǵa shaqyramyz. Ádiletti Qazaqstandy bizge eshkim daıyn kúıde alaqanymyzǵa salyp bermeıdi, ony ózimiz quramyz» – dedi Dıdar Smaǵulov.
