Ádildik kútemin – BQO-da bosaný kezinde kóz jumǵan áıeldiń kúıeýi

ORAL. KAZINFORM – Batys Qazaqstan oblysy Jańaqala aýdandyq ortalyq aýrýhanasynda bosaný kezinde kóz jumǵan áıeldiń kúıeýi Nurjan Qanatov polıtsııaǵa shaǵym túsirdi.

N.Qanatovtyń aıtýynsha, bıyl 36 jasqa tolatyn kelinshegi aýrýhanaǵa 15 mamyr kúni óz aıaǵymen barǵan.

«Buǵan deıin ol densaýlyǵyna shaǵymdanǵan emes. Qalaǵa ketkimiz kelgen, alaıda úlgermeısińder dep sol aýrýhanada qaldyrdy. Sodan keshke súıegin alyp shyqtyq qoı. Ózimen birge qursaǵyndaǵy qyz bala – shaqalaq ta shetinep ketti. Artynda úsh ulym qaldy. Úlkeni 11-de, kishisi 5-te. Polıtsııaǵa bergen aryzym durys qaralyp, kináli adamdar jazasyn alsa deımin. Ádildik kútemin», dedi Kazinform tilshisine N.Qanatov. 

BQO polıtsııa departamenti men oblystyq densaýlyq saqtaý basqarmasynyń baspasóz qyzmeti osy qaıǵyly oqıǵanyń jaı-japsary anyqtalyp jatqanyn, aqparatty keıin beretinin jetkizdi.

Eske sala keteıik, budan buryn Batys Qazaqstanda júkti áıeldiń bosaný kezinde kóz jumǵanyn jazǵan bolatynbyz.