Ádil Muhamedjanov Qazaqstan qor bırjasynyń basshysy bolyp taǵaıyndaldy
ASTANA. KAZINFORM – «Qazaqstan qor bırjasy» AQ (KASE) basqarma tóraǵasy laýazymyna Ádil Muhamedjanovtyń taǵaıyndalǵanyn málimdedi.
Ádil Muhamedjanov Qazaqstannyń qarjy salasynda 20 jyldan astam ýaqyt jumys istegen. Óziniń kásibı qyzmetin 2002 jyly Ulttyq banktiń monetarlyq operatsııalar departamentinde bastap, birneshe jaýapty laýazymdarda eńbek etken. Sonyń ishinde departament dırektorynyń orynbasary qyzmetin atqaryp, aqsha-nesıe saıasatyn júzege asyrý men Ulttyq qor aktıvterin basqarýǵa jaýapty bolǵan.
Keıinirek Á.Muhamedjanov KASE basqarma tóraǵasynyń orynbasary bolyp jumys istep, saýda-sattyq jáne klırıng qyzmetin baqylaýmen jáne úılestirýmen aınalysqan. Onyń jetekshiligimen valıýta naryǵynda saýda-klırıng júıesi iske qosyldy.
Búgingi taǵaıyndaýǵa deıin Ádil Muhamedjanov «Baǵaly qaǵazdardyń ortalyq depozıtarııi» AQ basqarma tóraǵasy qyzmetin atqardy.
Onyń jetekshiligimen 2022–2024 jyldarǵa arnalǵan ortalyq depozıtarııdi damytý strategııasy, onyń ishinde aýqymdy tsıfrlyq transformatsııa jáne jergilikti depozıtarlyq hab retinde damý bastamalary tabysty júzege asyryldy.
Aıta keteıik, 28 naýryzdan bastap KASE basqarma tóraıymy Alına Aldambergenniń ókilettigi óz bastamasy boıynsha merziminen buryn toqtatyldy.