Ádil Qusmanov Strategııalyq josparlaý jáne reformalar agenttigi tóraǵasynyń orynbasary boldy
ASTANA. KAZINFORM — Óz kezeginde Syrymbet Qaskeev Strategııalyq josparlaý jáne reformalar agenttigi tóraǵasynyń orynbasary qyzmetinen ketti, dep habarlaıdy Aqordanyń baspasóz qyzmeti.
Memleket basshysynyń ókimimen Syrymbet Erdenuly Qaskeev Strategııalyq josparlaý jáne reformalar agenttigi tóraǵasynyń orynbasary laýazymynan bosatyldy.
— Prezıdent ókimimen Ádil Mıratuly Qusmanov Qazaqstan Respýblıkasynyń Strategııalyq josparlaý jáne reformalar agenttigi tóraǵasynyń orynbasary laýazymyna taǵaıyndaldy, — delingen habarlamada.
Ádil Mıratuly 1994 jyly 25 qańtarda Shyǵys Qazaqstan oblysynda dúnıege kelgen.
«Bolashaq» baǵdarlamasy boıynsha Ulybrıtanııanyń Oksford ýnıversıtetinde (University of Oxford) matematıkalyq modeldeý jáne ǵylymı esepteýler mamandyǵy boıynsha magıstr dárejesin, sondaı-aq Nazarbaev Ýnıversıtetinde matematıka mamandyǵy boıynsha bakalavr dárejesin alǵan.
Eńbek jolyn 2018-2020 jyldary QR Tuńǵysh Prezıdenti Qory janyndaǵy Álemdik ekonomıka jáne saıasat ınstıtýtynda jetekshi sarapshy retinde bastaǵan.
2020-2023 jyldary QR Prezıdenti janyndaǵy áleýmettik-ekonomıkalyq reformalardy taldaý jáne monıtorıngileý ortalyǵynyń saraptamalyq-taldaý tobynyń konsýltanty, jetekshiniń orynbasary, jetekshi qyzmetin atqarǵan.
2023 jylǵy qańtar — 2024 jylǵy qarasha aralyǵynda QR Ulttyq ekonomıka mınıstrliginiń «Ekonomıkalyq zertteýler ınstıtýty» AQ Basqarma tóraǵasynyń orynbasary.
2024 jylǵy qarasha aıynan bastap «Halyqaralyq baǵdarlamalar ortalyǵy» AQ basqarma tóraǵasy boldy.
Prezıdenttik jastar kadrlyq rezerviniń 3.0 múshesi.
«Eren eńbegi úshin» medalimen, QR Prezıdentiniń, QR Prezıdenti Ákimshiligi basshylyǵynyń, QR Premer-Mınıstriniń alǵys hattarymen marapattalǵan.
Qazaq, orys, aǵylshyn jáne túrik tilderin erkin meńgergen.
Budan buryn ShQO jolaýshy kóligi basqarmasyna jańa basshy taǵaıyndalǵanyn jazǵan edik.
