Ádil Beketaev: Basqa elderde hokkeıdiń deńgeıi kóterilip keledi

HARBIN.KAZINFORM – Qazaqstan hokkeı quramasynyń oıynshysy Ádil Beketaev búgingi Qytaıǵa qarsy oıyn týraly oıymen bólisti. Qazaqstandyq qorǵaýshynyń aıtýynsha, qytaılyq hokkeıshiler óte jaqsy daıyndalǵan.

– Qytaı komandasy qorǵanysta óte jaqsy daıyndalǵan. Biz negizi kóp shabýyldadyq. Alaıda olar jaqsy qorǵanys jasady. Qazirgi ýaqytta barlyq komandanyń deńgeıi kóterilip keledi, 20-30 shaıba soǵý sııaqty jaǵdaılar kóp kezdese bermeıdi, - dedi ol. 

Sondaı-aq, Beketaev sońǵy kezeńde Qazaqstan quramasynyń shaıba ótkizip alýyn túsindirdi.

– Oıyn barysynda bizden eki adam alańnan ýaqytsha shettetildi. Qytaılyqtar osy múmkindigin sátti paıdalanyp, bizge bir shaıba saldy. Olarda kóp múmkindik bolǵan joq, al eń bastysy biz jaqsy oıyn kórsettik, - dedi qazaqstandyq qorǵaýshy. 

Sońynda, otandasymyz quramanyń fınalǵa shyǵý múmkindigine baılanysty suraqqa jaýap berip, barlyq matchta jeńiske jetýge kúsh salatynyn aıtty.

Beketaev Ádil Maratuly – Qazaqstan Respýblıkasynyń hokkeıden sport sheberi, jastar arasyndaǵy álem chempıonatynyń qola júldegeri jáne jeńimpazy. IX qysqy Azııa oıyndarynyń ashylý saltanatynda, ol short-trekshi Olga Tıhonovamen birge Qazaqstan týyn kóterip shyǵady.

Aıta keteıik, IX qysqy Azııa oıyndary 2025 jyldyń 7-14 aqpany aralyǵynda Qytaı Halyq Respýblıkasy Heılýntszıan provıntsııasynyń Harbın qalasynda ótedi.

Sportshylar 11 sport túri boıynsha 64 medal jıyntyǵyn sarapqa salady.  

Eske sala ketsek, Hokkeıden Qazaqstan erler quramasy búgin toptyq kezeńniń ekinshi matchynda qytaımen kezdesip, 6:1 esebimen jeńiske jetti. 

Osyǵan deıin, otandastarymyz Taılandty 12:0 esebimen tize búktirdi.