Ádistemelerge qoıylatyn ortaq talap bekitilgeni durys - pedagog
AQTÓBE. QazAqparat - Aqtóbe oblysynyń ustazdary «Pedagog mártebesi týraly» Zań jobasy aıasynda ádistemelerge qoıylatyn ortaq talapty bekitýdi surady. Sebebi, muǵalimder ádisteme daıyndaǵanymen, keıbiri jaramsyz, qate bolyp shyǵady, dep habarlaıdy QazAqparat tilshisi.
Elbasy Nursultan Nazarbaevtyń tapsyrmasymen óńirlerde «Pedagog mártebesi týraly» Zań jobasy talqylanyp jatyr. Aqtóbe oblysy, Hromtaý qalasyndaǵy №6 Hromtaý gımnazııasynyń dırektory Gúlmarash Muqasheva ujymda talqyǵa túsip, ustazdardy alańdatqan birneshe usynyspen bólisti.
«Birinshiden, QR «Bilim týraly» Zańyna sáıkes pedagogtar kem degende bes jylda bir ret biliktilik kýrsynan ótedi. Qazir bazalyq kýrspen birge deńgeılik, jańartylǵan bilim berý mazmunyna daıarlyq kýrsy bar. Osy kýrstarǵa aýyldan keletin muǵalimderdiń jaǵdaıy qarastyrylmaǵan. Muǵalimder tanysynyń, týysynyń úıinde, tipti páter jaldap turýǵa májbúr. Sondyqtan biliktiligin kóterip ári shıpajaıda tegin demalatyn jobany usynamyz. Ekinshiden, osy biliktilik kýrstary men oqý semınarlaryn aqyly ótkizetin, túrli sertıfıkat beretin ortalyq óte kóp, bárine shekteý qoıý qajet. Tek memlekettik basqarý oryndaryna qaraıtyn, arnaýly, joǵary oqý oryndaryna ǵana osy quzirettilik berilse degen tilek bar. Úshinshiden, muǵalim ádisteme qurastyrady, ózi baspadan shyǵarady. Sońynda bar eńbegi zaıa ketip, jaramsyz, qate bolyp shyǵady. Olqylyq bolmas úshin ádisteme quraldaryn bir ortalyq shyǵaryp, negizgi talaptary bekitilse deımiz», - dedi №6 Hromtaý gımnazııasynyń dırektory Gúlmarash Muqasheva.
Hromtaýlyq ustazdar Tamyz keńesi men Muǵalimder merekesi kezinde marapattaý azdyq etetinin jetkizdi. Ári Y.Altynsarın tósbelgisi, Oqý isiniń úzdigi marapatyna aýdan, aýyl muǵalimderin usyný, berý áli de tómen ekenin jasyrmady.
«Jeke mekemelerge 15 myń, keıde 60-70 myń teńge aqy tólep, qalaǵan medal men marapatty alýǵa bolady. Biraq ol marapattyń syı-qurmeti, salmaǵy joq. «Pedagog mártebesi týraly» Zańnyń maqsat-mindetteri de, jaýapkershiligi de, qoǵam aldyndaǵy róli de joǵary bolaryna senemiz. Zań muǵalimderdiń quqyǵyn qorǵap, pedagogtyń fýnktsıonaldyq mindetterin aıqyndap berýi tıis. Sondyqtan, zań jobasyn el bolyp talqylap, ǵylymı turǵyda súzgiden ótkizip, minsiz qujat bolyp shyǵýyna árbirimiz múddelimiz», - dedi Y.Altynsarın tósbelgisiniń ıegeri G.Muqasheva.
