Adılıa Tilekenova Tedegi Gran-prı týrnıriniń fınalynda baq synaıdy
NUR-SULTAN. QazAqparat - Bul kúnderi Frantsııanyń Te qalasynda kórkem gımnastıkadan Gran-prı týrnıri jalǵasýda. Qazaqstan sapynan atalǵan synǵa Adılıa Tilekenova qatysyp jatyr, dep habarlaıdy Olympic.kz.
Ókinishke qaraı, kópsaıys qorytyndysy boıynsha qazaqstandyq sportshy fınalǵa óte alǵan joq. Tek jekelegen tórt jattyǵýdyń bireýinde ǵana Adılıa aqtyq synda baq synaıdy.
Atap aıtar bolsaq, Tilekenova taspamen jattyǵýda Gran-prı týrnıriniń fınalynda óner kórsetedi. Bul jattyǵý boıynsha jalpy esebi toǵyz sportshy júldege talaspaq.
Adılıa Tilekenova Qazaqstan komandasy sapynda Azııa oıyndarynyń chempıony atanǵanyn esterińizge salamyz.
Al qurama kóshbasshysy Alına Ádilhanova bul jarysqa qatysqan joq.
