Ádilhan Erjanovtyń «Sary mysyq» kórkem fılmi eki halyqaralyq baıqaýǵa qatysyp jatyr
NUR-SULTAN. QazAqparat – Qazaqstandyq rejısser Ádilhan Erjanovtyń «Sary mysyq» kórkem fılmi eki halyqaralyq baıqaýǵa qatysyp jatyr, dep habarlaıdy QazAqparat Qazaqfılm kınostýdııasyna silteme jasap.
«Dostar, biz ótken jyly Venetsııa kınofestıvalindegi premerasymen dúnıejúzi kınokórsetilimder arqyly saltanatty sherýin bastaǵan Ádilhan Erjanovtyń «Sary mysyq» kórkem fılminiń jańa jetistikteri týraly qýana habarlaımyz. Kınotýyndy 45-shi Gonkong Halyqaralyq kınofestıvaliniń baǵdarlamasyna «Avtorlar» bólimine kirdi, sonymen qatar bedeldi reseılik «Nıka» kınosyılyǵynyń «TMD, Baltyq Grýzııa elderiniń úzdik fılmderi» nomınatsııasyna usynyldy», delingen habarlamada.
«Bul úlken qýanysh pen abyroı, men bizdiń ujymnyń eńbegi eleýsiz qalmaǵanyna qýanyshtymyn. «Sary mysyqtyń» shyǵarmashylyq ujymyn fılmniń kezekti jetistigimen quttyqtaımyn!» – dep jazdy fılmniń rejısseri Ádilhan Erjanov Facebook-tegi paraqshasynda.
