Ádilhan Erjanovtyń fılmi Venetsııa kınofestıvaline qatysady
NUR-SULTAN. QazAqparat - Rejısser Ádilhan Erjanovtyń «Sary mysyq» kórkem fılmi 77-shi Halyqaralyq Venetsııa kınofestıvaliniń «Kókjıekter» konkýrstyq baǵdarlamasyna qatysady, dep habarlaıdy QazAqparat «Qazaqfılm» knıostýdııasyna silteme jasap.
Álemniń eń iri jáne bedeldi festıvalderiniń biri bıyl 2-12 qyrkúıek aralyǵynda jandy formatta ótedi. «Kókjıekter» baǵdarlamasynyń halyqaralyq qazylar alqasyn ataqty frantsýz kınogeri Kler Denı («Jaqsy jumys», «Іshtegi jaıdarly shýaq», «Aqsúıekter qoǵamy») basqarady.
«Sary mysyq» («Jeltaıa koshka»)kınotýyndysyn Short Brothers (Qazaqstan) kompanııasy, Sh.Aımanov atyndaǵy «Qazaqfılm» AQ (Qazaqstan) jáne Arizona Productions (Frantsııa) kınostýdııasynyń qatysýymen ZERDE FILMS (Qazaqstan) kompanııasy túsirgen.
«Sary mysyq» – rejısser Ádilhan Erjanovtyń toǵyzynshy tolyqmetrajdy kórkem fılmi. Túsirilim jumysy byltyr Almaty oblysynda ótti. Fılmniń bas prodıýserleri: Ásel Sádýaqasova, Qanat Bıtemirov jáne Erbol Toıbaev.
«Men úshin Kermek keıipkerlerimizdiń ishindegi eń meıirimdisi, onyń qazirgideı kúrdeli ýaqytta paıda bolýynda da bir mán bar. Árıne, «Kókjıekter» baǵdarlamasyna qatysatynymyzǵa qýanyshtymyn. Meniń oıymsha, Venetsııa kınofestıvaliniń buryńǵy formatta ótýiniń ózi, tusaýkeseri bolatyn kez kelgen fılm úshin úlken sáttilik. Osyndaı múmkindik úshin festıval irikteýshilerine jáne shyǵarmashylyq ujymǵa alǵys aıtamyn», - dedi Ádilhan Erjanov.
Fılm qazaqstandyq «Bonnı men Klaıdtyń» oqıǵasyn baıandaıdy. Túrmeden shyǵyp, elge oralǵan Kermek esimdi jas jigit, óziniń týyp-ósken qalasynda belgili bir qylmystyq toptyń óz zańdaryn ornatqanyn kóredi. Eva atty súıiktisi de osy adamdardyń qysym kórsetýimen teris jolǵa túsip ketken, Kermek te qylmysqa belshesinen batýǵa májbúr bolady. Degenmen ol súıgen qyzben birge erkindikke qol jetkizip, kınoteatr salý týraly armanyn iske asyrmaq bolady...
Kermekti reseılik akter Azamat Nyǵmanov oınaıdy. Kórermender ony Alekseı Mızgırevtiń «Konvoı», Andreı Shalopanyń «28 panfılovshylar» kartınasy arqyly biledi. Evanyń rólin Narıman Tórebaevtyń «Grıaz bolshogo goroda», Álisher Súleımenovtiń «Shatyr ústindegi bult» kartınalaryna túsken qazaqstandyq jas aktrısa Kamıla Nuǵmanova somdaıdy. Eki akter de Erjanovtyń kartınasyna alǵash ret túsip otyr. Jambas esimdi qylmyskerdiń rólin osyǵan deıin rejısserdiń «Atbaıdyń shaıqasy» jáne «Ulbolsyn» fılmderine túsken akter Sanjar Mádı oınaıdy. Sonymen qatar, fılmge Erkin Ǵubashev jáne Erjan Jamanqulov túsken, olar Erjanovtyń basqa da kartınalaryna qatysqan bolatyn.
Fılmniń stsenarıı avtorlary Ádilhan Erjanov pen Inna Smaılova. Prodıýserlik mindetti rejısserdiń turaqty áriptesteri Serik Ábishev pen Olga Hlaşeva atqardy. Kartınanyń ko-prodıýseri frantsýz mamany Gııom de Sıel. Fılmniń operatory osyǵan deıin Ádilhan Erjanovtyń «Úkili kámshat» jáne «Atbaıdyń shaıqasy» fılmderin taspalaǵan – Erkinbek Pitirálıev. Qoıýshy-sýretshi – Ermek Ótegenov, mýzykasyn jazǵan qazaqstandyq tanymal kompozıtor Alım Zaırov.
