Ádiletti Qazaqstandy quryp jatyrmyz – Memleket basshysy

NUR-SULTAN. QazAqparat – Jańa saılaý naýqanynyń merzimderin elge ashyq jarııalaý ashyqtyq qaǵıdatyna saı keledi. Prezıdent Qasym-Jomart Toqaev Qazaqstan halqyna Joldaýynda osyndaı oı aıtty, dep habarlaıdy QazAqparat tilshisi.

«Bıyl Prezıdent saılaýy, kelesi jyly Májilis jáne máslıhat depýtattarynyń saılaýy ótedi. Sodan keıin Úkimet quramy jasaqtalady.

Sonyń nátıjesinde 2023 jyldyń ortasynda Prezıdent, Parlament, Úkimet sııaqty negizgi saıası ınstıtýttardyń bári qaıta jańǵyryp, jańarady.

Biz ashyq básekelestik ornyqqan jáne bárine teń múmkindik beriletin Ádiletti Qazaqstandy quryp jatyrmyz», - dedi Memleket basshysy.

Prezıdent aýqymdy saıası ózgeristerdi ashyqtyq, ádildik jáne ózara senim arqyly júzege asyrý asa mańyzdy ekenin eske saldy.

«Jańa saılaý naýqanynyń merzimderin jáne onyń retin elge ashyq jarııalaý sheshim qabyldaý kezindegi ashyqtyq qaǵıdatyna saı keledi.

Osy qadamnyń bári bizdiń «Kúshti Prezıdent – yqpaldy Parlament – esep beretin Úkimet» atty basty formýlamyzdy birtindep naqty mán-mazmunmen baıyta túsedi. Bizdiń búgingi bastamalarymyz Qazaqstannyń bolashaǵyn aıqyndaıdy. Biz kún saıyn eski men jańanyń, toqyraý men damýdyń arasynan tańdaý jasaımyz. Barshańyzdy ult múddesi úshin uıysýǵa shaqyramyn»,- dedi Qasym-JomartToqaev.