Ádilet mınıstrliginiń ókilderi «Ádilet organdary keńes beredi» atty taqyrypta respýblıkalyq aktsııa uıymdastyrady
ASTANA. 13 mamyr. QazAqparat /Aıdar Ospanalıev/ - Ádilet mınıstrliginiń ókilderi 18- 20 mamyr aralyǵynda «Ádilet organdary keńes beredi» atty taqyrypta respýblıkalyq aktsııa uıymdastyrmaqshy.
Bul týraly búgin jýrnalıstermen bolǵan brıfıngte Ádilet mınıstrliginiń resmı ókili Erbolat Erimbet málim etti.
Aktsııanyń maqsaty - quqyq máselesi boıynsha azamattarǵa kómek berý. Sharaǵa ádilet organdary men «Nur Otan» partııasynyń ókilderi jáne advokattar men notarıýstar qatysady. Shara aıasynda qalyń kópshilikpen 85 kezdesý uıymdastyrylyp, keńes berýshiler eldegi 58 túrli kásiporynǵa baryp, ondaǵy azamattarmen tildesedi. «Sondaı-aq ádilet salasynyń ókilderi 65 joǵary oqý ornynda bolady, elimiz boıynsha 70 halyqqa qyzmet etý ortalyqtaryndaǵy jaǵdaımen tanysady. Aktsııaǵa qatysty ózge de málimetterdi Ádilet mınıstrliginiń saıtynan alýǵa bolady»,-dedi resmı ókil.
