Ádilet mınıstrliginiń bıylǵy basym mindetteri aıqyndaldy

NUR-SULTAN. QazAqparat – QR Ádilet vıtse-mınıstr Natalıa Pan vedomstvonyń aldynda norma shyǵarý salasynda turǵan basym mindetterdi atady, dep habarlaıdy QazAqparat tilshisi.

«Aldaǵy kezeńge norma shyǵarý salasynda mynadaı basym mindetter qoıyldy: Birinshiden, Úkimettiń zań jobalaý jumystarynyń 2021 jylǵa arnalǵan josparynyń oryndalýyn qadaǵalaý; ekinshiden, zań shyǵarý jumysynyń 2021-2026 jyldarǵa arnalǵan tujyrymdamalyq josparyn qabyldaý; úshinshiden, quqyqtyq saıasat tujyrymdamasyn qabyldaý; tórtinshiden, qabyldanǵan Ákimshilik rásimdik-protsestik kodeksti iske asyrý; besinshiden, jergilikti atqarýshy jáne ókildi organdardyń quqyqtyq aktilerine ortalyqtandyrylǵan saraptama jasaýǵa kóshý; altynshydan, normashyǵarmashylyqty jetildirý máseleleri boıynsha zań jobasyn Parlamentte súıemeldeý», - dedi ol mınıstrliktiń keńeıtilgen alqa otyrysynda.

Sondaı-aq, vıtse-mınıstr atalǵan zań jobasy aıasynda «E-zańnama» júıesi arqyly norma shyǵarý protsesin avtomattandyrý boıynsha jumystar qatar júrgiziletindigin basa aıtty.

«Munan bólek, taǵy 2 zań jobasy ázirlenedi. Olar: azamattyq zańnamany jetildirý jáne aǵylshyn jáne Eýropalyq quqyq qaǵıdattary men erejelerin ımplementatsııalaý negizinde kásipkerlik qyzmet úshin jaǵdaılardy jaqsartý máseleleri boıynsha; ádilet organdary qyzmetiniń máseleleri boıynsha», - dedi Natalıa Pan.