Ádilet mınıstrligine jumys ornynda tıisý máselesin Qylmystyq kodekspen retteý týraly usynys tústi

ASTANA. QazAqparat – Ádilet mınıstrligine jynystyq maqsatpen mazasyn alý daýlaryn Qylmystyq kodekspen retteý týraly usynys tústi. Májilis depýtattaryna qylmystyq zańnamaǵa usynylǵan túzetýlerdi tanystyrǵan vıtse-mınıstri Alma Muqanova BAQ ókilderine bergen suhbatynda osyndaı málimet aıtty, dep habarlaıdy QazAqparat tilshisi.

«Búgin depýtattarǵa tanystyrǵan zań jobasynyń aıasynda bul másele qaralyp jatqan joq. Biraq Ádilet mınıstrliginiń qaraýyna eńbek sarapshylarynan Qylmystyq kodekske osy máselege baılanysty norma engizý jóninde usynys tústi. Jalpy mundaı másele bar. Sondyqtan qosymsha zerdelenedi. Biz memlekettik organ bolǵandyqtan kez kelgen usynysty qabyldap, bekite almaımyz. Qandaı da bir normany engizý úshin ony negizdeýimiz kerek. Sondyqtan bizdiń zerdeleýimiz qandaı da bir faktilerge, statıstıkalyq málimetterge súıenedi. Halyqaralyq tájirıbe men teorııalar eskeriledi. Mundaı norma engizý oryndy dep tanylsa, kodeks aıasynda bastama kóteremiz», - dedi ol.

Sondaı-aq, Alma Muqanova zańdaǵy dıspozıtsııa men odan týyndaıtyn sanktsııalardy durys qalyptastyrý úshin qazirgi ahýaldy tolyq zerdeleý qajettigin eske saldy.

«Mysaly, «jumys ornynda jynystyq maqsatpen mazasyn alý» dep jazyp qoıa almaımyz. Mazasyn alý degen uǵymnyń astarynda qandaı áreketterdi aıtyp turǵanymyzdy aıqyn túsindirip, zań turǵysynan negizdeýimiz kerek», - dedi vıtse-mınıstr.