Ádilet mınıstrliginde QR Úkimeti janyndaǵy zań jobalaý qyzmetiniń máseleleri boıynsha vedomstvoaralyq komıssııa jıyny ótti
ASTANA. Sáýirdiń 13-i. QazAqparat /Ǵalymjan Hasenov/ - Ádilet vıtse-mınıstri Dýlat Qustaýletovtyń tóraǵalyǵymen jáne memlekettik organdar ókilderiniń qatysýymen Ádilet mınıstrliginde QR Úkimeti janyndaǵy zań jobalaý qyzmetiniń máseleleri boıynsha vedomstvoaralyq komıssııanyń jıyny ótti
BAQ-tar úshin taratylǵan baspasóz málimdemesinde habarlanǵandaı, 215-inshi jıynǵa qatysýshylar birqatar zań jobalaryn qarastyrdy. Atap aıtqanda, Parlament Májilisiniń depýtattary usynǵan «Etıl spırti men alkogol óniminiń óndirilýin jáne aınalymyn memlekettik retteý týraly» QR Zańyna ózgerister men qosymshalar engizý týraly» jáne «Esirtki, psıhotroptyq zattar, prekýrsorlar men olardyń zańsyz aınalymy men olardy shekten tys paıdalaný týraly» QR Zańyna qosymshalar engizý týraly» zańdar jobalary talqylandy.
Jıynda sondaı-aq «Azaptaý jáne basqa da aıaýsyz, adam tózgisiz nemese namysty qorlaıtyn azaptardyń aldyn alýǵa baǵyttalǵan ulttyq eskertpeli tetikter qurý máseleleri boıynsha QR keıbir zańdyq aktilerine ózgerister men qosymshalar engizý týraly» zań jobasynyń tujyrymdamasy qaraldy.
Komıssııa zańdy ázirleýshi memlekettik organdarǵa joǵaryda atalǵan zańdar jobalaryna Úkimettiń Qorytyndysyn daıarlaýdy usyndy jáne Ádilet mınıstrligine ulttyq eskertpeli mehanızmder týraly zań jobasyn jasaýy oryndy ekenin maquldady.
Qarjy mınıstrligine, Komıssııa músheleriniń eskertýleri men usynystaryn eskere otyryp, «Islamdyq qarjylandyrýdy uıymdastyrý máseleleri boıynsha QR keıbir zańdyq aktilerine qosymshalar men ózgerister engizý týraly» zań jobasynyń tujyrymdamasyn qaıta óńdeý usynyldy.
Zańdardy jasaýshylarǵa elimiz úshin asa mańyzdy zańdar jobalaryn ázirleýdi jedeldetip jáne belgilengen merzimde Úkimet pen Parlament Májilisine tapsyrýdy eske saldy. Olardyń ishinde «Qazaqstan Respýblıkasynda baqylaý jáne qadaǵalaý isi týraly», «Qazaqstan Respýblıkasynyń Keden kodeksi» (jańa redaktsııa), «Qazaqstan Respýblıkasynda Keden kodeksin iske engizý týraly», «Lotereıa men lotereıa isi týraly», «Notarıat týraly» Zańǵa ózgertýler men qosymshalar engizý týraly», «Gendik-ınjenerlik qyzmetti memlekettik retteý týraly», «Qazaqstan Respýblıkasynyń turǵyn úı qatynastary máseleleri jónindegi keıbir zańdyq aktilerge ózgerister men qosymshalar engizý týraly» jáne taǵy basqa da qujattar bar, dep atap kórsetilgen Ádilet mınıstrliginiń baspasóz málimdemesinde.
