Ádilet mınıstrliginde alqa májilisi ótti
ASTANA. 21 shilde. QazAqparat - Keshe QR Ádilet mınıstrliginde alqa májilisi bolyp ótti. Jıynǵa beıne-konferentsııa baılanysy arqyly oblystyq ádilet, qylmystyq-atqarý júıesi, sot aktilerin oryndaý departamentteriniń basshylary, jyljymaıtyn múlik jáne sot saraptama ortalyqtarynyń dırektorlary qatysty.
Bul týraly vedomstvonyń baspasóz qyzmetinen habarlandy.
«Alqa barysynda ádilet organdary jumysyndaǵy naqty oń nátıjeler týraly sóz boldy. Ásirese, memlekettik organdardyń zań shyǵarý qyzmeti sapasyn odan ári kóterý, normashyǵarmashylyq salasyndaǵy ádilet organdarynyń jáne Zańnama ınstıtýtynyń úılestirý rólin kúsheıtý qajettigi aıtyldy. Bıznes úshin tirkeý rásimderin ońaılatý jáne turǵyndarǵa kórsetiletin elektrondy qyzmet túrlerin keńeıtý suraqtary bólek qaraldy», - delingen baspasóz aıǵaǵynda.
Toqtala ketetin jaıt, mınıstrlik aǵymdaǵy jyly kommertsııalyq uıymdardy tirkeýdi habarlandyrý tártibine aýysýdy qarastyratyn zań jobasyn jasaýǵa kirisedi. Sonymen qatar azamattardyń quqyqtary men múddelerin qamtamasyz etý maqsatynda jeke notarıýstardy eseptik tirkeý týraly jańa Ereje men notarıaldyq is-júrgizý Nusqaýy bekitilgen. Atalǵan qujattarmen notarıýstar ǵımarattary men jeke notarıaldyq muraǵattaryna talaptardy belgilep, qujattardy muraǵatqa ótkizý tártibin qarastyrady.
Budan basqa, keńeste sot aktilerin oryndaý máseleleri de talqylandy. Ásirese, sot oryndaýshylary ókilettigine qatysty zańnamany jetildirý máseleleri kóterilip, boryshkerlerge yqpal etetin naqty tetiktiń joqtyǵy jáne materıaldyq-tehnıkalyq qamtamasyz etý suraqtary sóz boldy. Osyǵan baılanysty, Sot aktilerin oryndaý komıtetine tıisti zań jobasyn daıyndaý mindetteldi.
«Aýmaqtyq bólimshelerdiń jekelegen basshylary jumysyndaǵy olqylyqtar jaıynda da áńgime boldy. Sondaı-aq alqa barysynda sybaılas jemqorlyqtyń aldyn alý jáne onymen kúres boıynsha jumysty qataıtý tapsyryldy. Halyqpen keri baılanysty uıymdastyrý jáne kez-kelgen eldi mekennen Quqyqtyq aqparat qyzmetiniń «119» biryńǵaı nómirine tegin qońyraý shalý jumysyn jandandyrý jaıy talqyǵa tústi», delingen baspasóz aıǵaǵynda.
