Ádilet mınıstrligi jartyjyldyq jumysyn qorytyndylady
ASTANA. Shildeniń 9-y. QazAqparat - Búgin QR Ádilet mınıstrliginiń alqa otyrysynda aǵymdaǵy jyldyń birinshi jartyjyldyǵyndaǵy jumys qorytyndysy shyǵaryldy.
Bul aqparatty atalǵan vedomstvonyń baspasóz qyzmeti taratyp otyr.
Ádilet organdarynyń negizgi baǵyttar boıynsha birqatar jumystyń sapasyn jaqsartqany sóz boldy. Atap aıtqanda, Úkimettiń zań jobalaý jumystary jospary tolyq kólemde oryndaldy. Parlamentke 12 zań jobasy engizildi. Zańdy tulǵalar men jyljymaıtyn múlikti tirkeý rásimin jeńildetý jumysy júrgizildi, halyqty elektrondyq qujattandyrý júıesi engizildi.
Mınıstr Rashıd Túsipbekov óz sózinde elektrondyq nysanda memlekettik qyzmet kórsetý úlesin arttyrý jumysyn jandandyrý qajettigin atap kórsetti. Atap aıtqanda, zańdy tulǵalarǵa, nekeni tirkeýge elektrondy túrde ótinish qabyldaýǵa qatysty elektrondyq nysanda aqparattyq qyzmet kórsetýdi engizý tapsyryldy.
«Múlik qatynastary salasynda jyljymaıtyn múlikke quqyqtardy shuǵyl tirkegeni úshin alym mólsherin edáýir azaıtýdy kózdeıtin Úkimet qaýlysynyń ázirlengen jobasyn qabyldaý oń áserin tıgizbek (páterge quqyqty shuǵyl tirkegeni úshin alym 40 myńnan 7 myń teńgege deıin tómendetiledi)», dep atap ótken baspasóz qyzmeti.
Ádilet organdary ortalyq jáne jergilikti memlekettik organdarǵa 305 tekserý júrgizip, nátıjesinde 390 zańsyz qoldanylatyn normatıvtik-quqyqtyq aktiler aıqyndalǵan.
Zańnamadaǵy silteme normalardy qysqartý maqsatynda Ádilet mınıstri sapaly zań jobalaryn ázirleý jóninde qurylǵan top aıasynda bolashaqta tikeleı qoldanylatyn zańdardy qabyldaýdy qamtamasyz ete otyryp, halyqaralyq tájirıbeni zerdeleýge kirisý qajettigin atap kórsetti.
Azamattardyń quqyqtyq mádenıetin kóterý úshin Mınıstr memlekettik organdar arasynda quqyqtyq nasıhatty vedomstvoaralyq úılestirý boıynsha júrgizilgen jumystyń tıimdiligin arttyrýdy tapsyrdy.
Ádilet organdary qabyldaıtyn sharalar memlekettik organdardyń zańnamany sapaly, júıeli túsindirý jáne halyqty zańdy saqtaı bilýge tárbıeleý jumysyna baǵyttalýy tıis.
R.Túsipbekov zańgerlik saýattylyqqa oqytýdy mektep qabyrǵasynan bastap engizý, sondaı-aq respýblıkanyń árbir azamaty bilýi tıis quqyqtyq bilimniń eń tómengi kólemin anyqtaý qajettigin atap aıtty. Bul bilim adamnyń, memlekettik organdar men uıymdardyń árbir azamattyń kúndelikti tirshiliginde qajet bolatyn quqyqtary men mindetteri týraly aqparatty qamtýy tıis.
Sondaı-aq, azamattardan, onyń ishinde ınternet resýrstaryna kelip túsken ótinishterdi sapaly qaraý qajettigin ádilet organdarynyń barlyq basshylarynyń nazaryna saldy.
Ádilet organdarynyń qyzmetin shynaıy baǵalaý úshin júrgizilgen jumysty keńinen jarııalaý kerektigi aıtyldy. Sonymen qatar, barlyq basshylarǵa BAQ pen halyq úshin barynsha aıqyn jumys júrgizýge tapsyrma berildi.
