Ádilet mınıstrligi zańgerlik qyzmet naryǵyn retteýde eshqandaı shuǵyl ózgeristerdi josparlap otyrǵan joq - Jaýapty hatshy
ALMATY. 15 qyrkúıek. QazAqparat /Erlik Erjanuly/ - Zańgerlik qyzmet naryǵyn retteýde qandaı da bir jańa tártip engiziletin bolsa ol kezeń-kezeńimen birtindep júrgiziletin bolady. Bul týraly Ádilet mınıstrliginiń jaýapty hatshysy Marat Beketaev búgin Almatyda ótip jatqan birinshi zańgerler forýmynda aıtty.
«Zańgerlik qyzmet naryǵyn retteýde qazirgi tańda eshqandaı ózgerister josparlanyp otyrǵan joq. Eger ol jasalatyn bolsa aldymen zańgerlik qoǵamdastyq arasynda talqylanatyn bolady. Jalpy zańgerlik qyzmet naryǵyn retteýdi shartty túrde quqyqtyq jáne naryqtyq dep ekige bólýge bolady», - deıdi Marat Beketaev.
Onyń aıtýynsha, Qazaqstanda quqyqtyq retteýdiń elementteri bar. Advokatýra, notarıat pen belgili bir deńgeıde múlikti baǵalaýshylarda zańdyq qyzmet naryǵy zańmen retteledi. Al ózge salalar sur aımaqta qalyp otyr. Olardyń keıbiri salalyq zańdarmen rettelgenimen joǵary deńgeıde emes. Endi bireýleri ózin-ózi retteýde.
